Կառավարությունը 50 մլն դոլարի վարկ կվերցնի, որ բարելավի առողջապահության որակը
Կառավարությունն այսօր հավանություն կտա Հայաստանի Հանրապետության և Ասիական զարգացման բանկի միջև «Առողջապահության որակի բարելավման ծրագիր» վարկային համաձայնագրի ստորագրման առաջարկությանը:
Որոշման համապատասխան նախագիծը, որը չզեկուցվող է, ներկայացվել է առողջապահության նախարար Անահիտ Ավանեսյանի կողմից։
Վարկի չափը կազմում է 50 մլն դոլար, որն ուղղվելու է առողջապահության որակի բարելավմանն ուղղված ծրագրի իրականացմանը։
Ծրագրի ընդհանուր նպատակն է աջակցել Հայաստանին բարելավելու բժշկական օգնության և սպասարկման որակը: Ծրագիրն իր մեջ ներառում է հետևյալ երեք բաղադրիչները՝ առողջապահական որակյալ ծառայությունների մատուցման, բժշկական օգնության և սպասարկման որակի համար կարողությունների և կազմակերպությունների ուժեղացում, բուժսպասարկման որակի չափման և հաշվետվողականության ինստիտուցիոնալացում:
