Այս յուղի տևական օգտագործումը մեծացնում է ինսուլտի ռիսկն առողջ մարդկանց մոտ
Որպես օմեգա-3 ճարպաթթուների աղբյուր՝ ձկան յուղը հաճախ խորհուրդ է տրվում սրտի և անոթների առողջության համար: Այնուամենայնիվ, վերջին ուսումնասիրությունը կասկածի տակ է դնում այս առաջարկությունները: Գրել է «Դոկտոր Պիտերը»։
Երկար և առողջ կյանքի համար առաջարկվող ամենահայտնի հավելումներից մեկը ձկան յուղն է: Ենթադրվում է, որ դրանում պարունակվող օմեգա-3 ճարպաթթուները օգտակար են արյունատար անոթների համար, նոսրացնում են արյունը և օգնում իջեցնել խոլեստերինի մակարդակը։
Այնուամենայնիվ, Չինաստանից, ԱՄՆ-ից, Մեծ Բրիտանիայից և Դանիայից մի խումբ գիտնականներ կասկածի տակ են դնում ձկան յուղի հավելումների առավելությունները: Մեծ Բրիտանիայի ավելի քան 400,000 մեծահասակների ուսումնասիրությունից հետո, որոնց մեկ երրորդը պարբերաբար ընդունել է հավելումները, եզրակացություն է եղել, որ ազդեցությունները կարող են խառը լինել:
«Առողջ սրտանոթային պրոֆիլ ունեցող մարդկանց համար ձկան յուղի հավելումների կանոնավոր օգտագործումը որպես առաջնային կանխարգելում կապված է նախասրտերի ֆիբրիլյացիայի բարձր ռիսկի հետ», - ասել են հետազոտողները BMJ Medicine բժշկական ամսագրում հրապարակված հոդվածում: Նրանց տվյալներով՝ նախասրտերի ֆիբրիլյացիայի առաջացման վտանգը աճել է 13%-ով։
Բացի այդ, առողջ մարդկանց մոտ ձկան յուղի տևական ընդունումը 5%-ով մեծացնում է ինսուլտի ռիսկը: Իսկ այն կանանց շրջանում, ովքեր սկզբում սրտի հետ կապված խնդիրներ չեն ունեցել, ինսուլտի, սրտի կաթվածի կամ սրտի անբավարարության հավանականությունը 6%-ով ավելի բարձր է եղել, եթե նրանք ձկան յուղի հավելումներ են ընդունել:
