Քերոբյանը Չինաստանում ներկայացրել է Հայաստանի ներդրումային միջավայրը

Էկոնոմիկայի նախարար Վահան Քերոբյանը հոկտեմբերի 17-ին ՉԺՀ մայրաքաղաք Պեկինում հանդիպել է «Xinjiang Xihai Industrial Group» ընկերության ղեկավարության և Արտերկրում չինական ձեռնարկությունների զարգացման ասոցիացիայի (China Overseas Development Association, CODA) նախագահ Հե Չժենվեյի հետ։ Հանդիպմանը ներկա էին ՉԺՀ֊ում ՀՀ առևտրական կցորդ Կորյուն Ղազարյանը և ՉԺՀ-ում ՀՀ դեսպան Սերգեյ Մանասարյանը։

Նախարարության հաղորդմամբ՝ հանդիպման ընթացքում քննարկվել են տնտեսության տարբեր ուղղություններով, մասնավորապես՝ էներգետիկայի ոլորտում երկկողմ համագործակցության հնարավորությունները։

Նախարար Վահան Քերոբյանը համառոտ ներկայացրել է Հայաստանի ներդրումային միջավայրը, ինչպես նաև կառավարության կողմից որդեգրած քաղաքականությունն օտարերկրյա ներդրումներ ներգրավելու նպատակով: