Բժիշկը խոսել է նռան անսպասելի օգտակարության մասին․ ինչպե՞ս ուտել՝ օրգանները չվնասելու համար
Նուռն ունի եզակի առողջարար հատկություններ և կարող է օգտակար լինել նաև բազմաթիվ հիվանդությունների դեպքում, Gazeta.Ru-ի հետ զրույցում ասել է էնդոկրինոլոգ և սննդաբան Օքսանա Միխալեւան։
Նրա խոսքով՝ նռան պտուղներն ու հատիկները պարունակում են բազմաթիվ կենսաբանական ակտիվ միացություններ, ինչը նրա նկատմամբ մեծ հետաքրքրություն է առաջացնում գիտական հանրության կողմից։
«Ըստ տարբեր հետազոտությունների՝ նուռն ունի հզոր հակաօքսիդանտ, հակամանրէային և հակաքաղցկեղային հատկություններ։ Կան ապացույցներ, որոնք ցույց են տալիս նռան օգտակարությունը նյութափոխանակության համախտանիշի, սրտանոթային, էնդոկրին, ռևմատոլոգիական և նույնիսկ ուռուցքաբանական հիվանդությունների և բերանի խոռոչի պաթոլոգիաների համար: Արձանագրվել է նաեւ դրա դրական ազդեցությունը մաշկի վիճակի վրա»,- ասել է Միխալեւան։
Մասնագետը նաև նշել է, որ երիտասարդ նուռը կարելի է ուտել սերմերի հետ՝ շնորհիվ մանրաթելերի պարունակության՝ դա օգնում է բարձրացնել դրա օգտակարությունն ու սննդային արժեքը։ Բջջանյութը, որն այսօր շատ հաճախ բացակայում է մարդկանց սննդակարգում, ունի բազմաթիվ օգտակար հատկություններ, այդ թվում՝ օգնում է կանխել աղիների քաղցկեղը, հեռացնել վնասակար նյութերը օրգանիզմից և պահպանել մարսողական համակարգի բնականոն աշխատանքը:
«Կարևոր է ընդգծել, որ կարելի է ուտել միայն փափուկ նռան հատիկները, քանի որ կոշտը կարող է վնասել ստամոքսի և աղիքների լորձաթաղանթը։ Բացի այդ, պետք է հիշել, որ նուռն ինքնին չի կարող բուժել որոշակի հիվանդություն, ուստի, եթե առողջական խնդիրներ ունեք, կարևոր է դիմել որակյալ բժշկական օգնության։ Ոչ մի դեպքում մի՛ զբաղվեք ինքնաբուժությամբ»,- զգուշացրել է մասնագետը։
