Հայաստանը Հնդկաստանում ռազմական կցորդ կունենա
Հնդկաստանում Հայաստանի դեսպանատունը ռազմական կցորդ կունենա։ Հաստիքը ստեղծելու որոշման նախագիծն ընդգրկված է ՀՀ կառավարության մայիսի 18-ի նիստի օրակարգում։
Նախագիծնը ներկայացնելու է ՀՀ պաշտպանության նախարար Սուրեն Պապիկյանը։
«Հնդկական կողմի ռազմաարդյունաբերական համալիրի պետական կառույցների, մասնավոր կազմակերպությունների և ընկերությունների կողմից փոխգործակցություն իրականացնելու ուղղությամբ վերջին ժամանակաշրջանում ցուցաբերած մեծ հետաքրքրությունն անհրաժեշտություն է առաջացրել Հնդկաստանի Հանրապետությունում ստեղծել Հայաստանի Հանրապետության ռազմական կցորդի հաստիք»,- ասվում է որոշման մեջ։
Ռազմական կցորդը ենթադրում է երկու երկրների ռազմական գերատեսչությունների հետ պաշտոնական կապերի հաստատում և խորացում, ռազմական ոլորտում հարաբերությունների զարգացում, համագործակցության ծրագրերի իրականացման մշտադիտարկում, օժանդակության ցուցաբերում նախարարության և զինված ուժերի պատվիրակությունների այցերի կազմակերպման ժամանակ:
