Բա որ քանդվի՞. Հաղթանակ կամուրջը գլխացավանք է դարձել ու դեռ կդառնա

Երևանի ավագանու ընդդիմադիր անդամ Իզաբելլա Աբգարյանը գրառում է արել՝ իրեն ահազանգած քաղաքացու մատնանշած խնդրի առնչությամբ:

Խնդիրը վերաբերում է Հաղթանակի կամրջի վերանորոգման աշխատանքներին, որոնք օրերս են մեկնարկել և կտևեն, ըստ Երևանի քաղաքապետարանի «աչքալուսանքի», մինչև նոյեմբերի 20-ը:

Առանց այդ էլ Երևանը խցանումների պատճառով չի կարողանում շնչել և ահա վերանորոգում՝ կենտրոնական կարևորագույն հանգույցում, որի պատճառով խցանումը հատկապես պիկ ժամերին հասնում է մինչև Արգավանդի խաչմերուկ:

Բայց սա այլ հարց է՝ շատ ցավոտ:

Իսկ հիմա, ըստ ավագանու անդամին ահազանգած քաղաքացու և եթե նա ճիշտ նկատառում է անում, Հաղթանակի կամրջի վերանորոգումը բացասական հետևանքներ կարող է ունենալ՝ բացի խցանումներից, վերանորոգումը մշտական գլխացավանք կդառնա:

«Ահազանգ եմ ստացել  շինարարից, որը մտահոգություն է հայտնել՝ Հաղթանակ կամրջի նորոգման աշխատանքների հետ կապված: Համացանցում տեսնելով այս լուսանկարը, շինարարն ասում է, որ նորմերի խախտում կա. բացակայում է նախապատրաստական շերտը, «խճի վրա պետք է բետոն լինի՝ 10+10+10 ամեն կողմից 150 դասի բետոն»:  Ահազանգողը զգուշացնում է, որ նստվածք է առաջանալու, ջուրը դեպի մայթեր կուտակվելու է և քանդելու: 
Քանի որ նման նրբությունների չեմ տիրապետում, հնարավորինս շատ մասնագիտական կարծիքներ եմ ակնկալում»,- գրել է Աբգարյանը:

MediaHub-ը հետամուտ կլինի խնդրի պարզաբանմանը: