Վանդալիզմը շարունակվում է. բնության հուշարձանը քանդելու համար որևէ մեկը պատասխանատվության չի ենթարկվել. Դեմոյան

Փարաջանովի անվան տուն թանգարանի հարակից տարածքում կառավարության թույլտվությամբ շարունակվում է բնության հուշարձանի քանդման-հարթեցման աշխատանքները։ Հայոց ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանն արդեն մի քանի անգամ է անդրադառնում այս խնդրին, սակայն, հուշարձանը պահպանելու համար համապատասխան կառույցների կողմից որևէ ջանք չի գործադրվել։ 

«Այս պահին կառավարության շենքում շարունակվում է կառավարության հերթական նիստը, իսկ Հրազդանի ձորում հենց այս պահին շարունակվում է 2008 թվականի սեպտեմբերին կառավարության որոշմամբ Երևան քաղաքի տարածքում բնության հուշարձանի կարգավիճակ ստացած ու պետական պահպանության տակ գտնվող ժայռերի հետևողական ոչնչացումը»,- MediaHub-ի հետ զրույցում ասում է Դեմոյանը, ապա ընդգծում, որ հուշարձանը գոյացել է հազարամյակների ընթացքում։ 

Այդօրինակ հուշարձաններ Երևանում շատ չեն։ Դեմոյանի խոսքով՝ 2008 թվականից դրանք ներառված են կառավարության կողմից  հաստատված բնական հուշարձանների շարքում։ Սակայն, նույն կառավարությունը տապալում է այդ որոշումը և հատուկ տեխնիկայի միջոցով հողին հավասարեցնում հուշարձանը, որը զբոսաշրջիկների այցելության վայրերից մեկն էր։

«Կառավարության որոշումը տապալող կառավարության ներկայացուցիչները հուշարձանը քանդելու համար պետք է պատասխանատվության ենթարկվեն։ Այս տարի նշում ենք Փարաջանովի 100-ամյակը, բայց հոբելյանական տարում նրանք որոշեցին թանգարանից ընդամենը 20մ հեռավորությամբ գտնվող տարածքը վերածել շինհրապարակի, կեղտի ու փոշու մեջ թողնել Փարաջանովի տուն թանգարանը»,- նշում է նա, ավելացնելով, որ ԿԳՄՍ նախարարության ներկայացուցիչը հայտարարել էր, որ քանի որ դա բնության հուշարձան է, ապա ԿԳՄՍ-ն դրա հետ գործ չունի:

Հիշեցնենք, նոյեմբերի 7-ին Հայկ Դեմոյանի գրառման հետքերով MediaHub-ը անմիջապես կապ էր հաստատել Երևանի քաղաքապետարանի լրատվական բաժնի հետ, որտեղից մեզ տեղեկացրել էին հետևյալը.  

 «Ս․թ․ նոյեմբերի 7-ին Երևան քաղաքի Հրազդանի կիրճի հատվածում Ս. Փարաջանովի 8 հասցեում Երևանի քաղաքապետարանի կողմից արձանագրվել է «ԿԱՄԵՐՏՈՒՆ» ՓԲԸ կողմից իրականացվող շինարարական աշխատանքների հետևանքով տարածքում առկա սյունաձև բազալտների վնասման դեպք։ 

Ս. Փարաջանովի 8 հասցեում գտնվող հողամասը սեփականության իրավունքով պատկանում է  «ԿԱՄԵՐՏՈՒՆ» ՓԲԸ-ին։ Երևանի քաղաքապետարանի կողմից 2024 թվականի հոկտեմբերի 14-ին նշված ընկերությանը տրամադրվել է բազմաֆունկցիոնալ հասարակական նշանակության շենքի կառուցման շինարարության թույլտվություն՝ հիմք ընդունելով ՀՀ կառավարության 2022 թվականի մայիսի 13-ի հ․659-Ա որոշմամբ հաստատված ներդրումային ծրագիրը»: Փաստացի, վանդալիզմը շարունակվում է:
Հունան Թադևոսյան