Հոգեբանները զգուշացրել են TikTok-ից կախվածության առաջացման մասին
Մարդիկ կարող են հոգեբանորեն կախվածություն ձեռք բերել TikTok-ից, զգուշացնում են Տրինիդադ եւ Տոբագոյի համալսարանի հոգեբանները։ Այս մասին նրանք խոսել են Addictive Behaviors ամսագրում հրապարակված հոդվածում․ գրում է News.am-ը։
Հետազոտողները հարցազրույց են անցկացրել 354 ուսանողների շրջանում, որոնցից 173-ն օգտվել են TikTok-ից, իսկ 313-ը՝ Facebook-ից (սեփականատեր Meta ընկերությունը ճանաչվել է որպես ծայրահեղական կազմակերպություն): Մասնակիցները հայտնել են, թե ունեն արդյոք կպչուն մտքեր այս սոցիալական ցանցերի հետ կապված, դրանցից ավելի ու ավելի շատ օգտվելու ցանկություն, մուտք են գործում արդյոք նրանք TikTok կամ Facebook անձնական խնդիրների մասին մոռանալու համար, զգում են արդյոք անհանգստություն կամ հիասթափություն, երբ չեն կարողանում մուտք գործել սոցիալական ցանց, եւ փորձել են արդյոք նրանք կրճատել այնտեղ գտնվելու ժամանակը: Մասնակիցները նաեւ լրացրել են հարցաթերթիկներ, որոնք գնահատել են նրանց անձը:
TikTok-ի օգտատերերի մեծամասնությունը սոցցանցից կախվածություն չի ունեցել։ Ցածր ռիսկային խմբում հայտնվել է հարցվածների 25,4 տոկոսը, բարձր ռիսկային խմբում՝ 6,4 տոկոսը։ Ինչպես Facebook-ից կախվածության վերաբերյալ նախկին հետազոտություններում, TikTok-ից կախվածություն ունեցողները էքստրավերսիայի եւ միայնակության բարձր միավորներով մարդիկ են եղել:
«Թեեւ մարդկանց մեծ մասն առանց խնդիրների է օգտագործում TikTok-ը, ուսումնասիրությունը ցույց է տալիս, որ չափից դուրս եւ խնդրահարույց օգտագործման վտանգը կա եւ այն կապված է կախվածություն առաջացնող վարքագծի հետ, որը կարող է պոտենցիալ բացասաբար ազդել մարդկանց առօրյա կյանքի վրա»,- նշել են աշխատանքի հեղինակները:
Սոցիալական ցանցերը հեշտացնում են մարդկանց միջեւ փոխհարաբերությունը, բայց չեն լուծում միայնակության կամ ցածր ինքնագնահատականի հետ կապված խնդիրները, բացատրել են գիտնականները։ Եթե TikTok-ը եւ այլ սոցիալական ցանցեր չափազանց շատ ժամանակ են խլում, իսկ դրանցից հրաժարվելու փորձերը հանգեցնում են միայն գրգռվածության եւ ցնցումների, պետք է դիմել մասնագետի:
