«Աչքերս փակեմ, ոտքս դնեմ գազին, Պոլիտեխնիկի մոտ նոր աչքերս բացեմ»․ վարորդները դժգոհ են փոփոխություններից

Սեպտեմբերին ընդառաջ երևանյան որոշ փողոցներ, մասնավորապես Իսահակյանն ու Մոսկովյանը դարձան միակողմանի երթևեկելի, ինչը վարորդների մեծ դժգոհությունը հարուցեց:

Շատերը նշում են, որ փոփոխությունները արվել են հապշտապ, շատ նյուանսներ չեն հաշվարկվել ու, օրինակ, Մոսկովյանը պետք է դարձնեին ոչ թե միակողմանի դեպի Աբովյան փողոց, այլ Իսահակյանն այդպիսին լիներ, քանի որ Նալբանդյանից եկող հատվածի հոսքի ծանրաբեռնվածությունն ընկնում է առանց այդ էլ միշտ խցանված Աբովյան փողոցի վրա:

MediaHub–ին ահազանգում են վարորդները՝ Երևանի կենտրոնում ճանապարհային գծանշումները փոխվելուց հետո նրանք երթևեկում են սթրեսային պայմաններում, առանց այդ էլ ոչ թեթև կյանքը էլ ավելի է բարդացել է։ Ինչպես նշում է ահազանգած վարորդներից մեկը՝ «կենտրոնի փողոցները դարձել են անկառավարելի»։

 MediaHub–ին ահազանգած վարորդներից մեկը նշում է․ «Արդեն խառնում ենք, ինչպե՞ս պետք է երթևեկել, եթե օրը մի բան փոխում են։ Հիմա, օրինակ՝ Աբովյան պուրակից դեպի Տերյան փողոց ինչպե՞ս կարելի է գնալ. արդեն մասշտաբային հարց է դառնում սա»։

Վարորդները նշում են, որ նույն Մոսկովյան փողոցը դարձնելով միակողմանի, իրականում ոչինչ էլ չի փոխվել, խցանումները շարունակվում են, ավոլի են սաստկացել, մասնավորապես, Ալեքսանդր Պուշկինի անվան թիվ 8 դպրոցի մոտ։ Ըստ ահազանգած քաղաքացու, ոչ մի դրական, արդյունավետ փոփոխություն չի արվել։

 «Ինչ արել են՝ միայն պրոբլեմ է եղել»,– նշեց նա։

«Մոսկովյան-Նալբանդյան-Խանջյանը տեսեք, մի քաոս է, Մոսկովյան փողոցի լուսացույցը չփակած, Նալբանդյան փողոցի լուսացույցն է բացվում, ու թե կհասցնե՞ս թեքվես Խանջյան, ուրեմն շնորհավորում եմ՝ դուք շահել եք անփորձանք խաչմերուկը հատելու հնարավորություն»,– ասաց մեկ այլ վարորդ։

Սթրեսային իրավիչակներում սրվում է հումորը, վարորդները համացանցում անգամ կատակում են․ 

«Մի խոսքով, աչքերս փակեմ, ոտքս դնեմ գազին, Պոլիտեխնիկական համալսարանի մոտ նոր աչքերս բացեմ»։

Հիշեցնենք, Երևանի քաղաքապետարանից տեղեկացրել են, որ օգոստոսի 31-ից Իսահակյան և Մոսկովյան փողոցներում՝ Նալբանդյան փողոցից Մաշտոցի պողոտա, Իսահակյան փողոցում՝ Նալբանդյան փողոցից դեպի Մաշտոցի պողոտա ուղղությամբ, իսկ Մոսկովյան փողոցում՝ Մաշտոցի պողոտայից դեպի Նալբանդյան փողոց ընկած ճանապարհահատվածներում երթևեկությունը կկազմակերպվի միակողմանի: Աբովյան – Իսահակյան փողոցների խաչմերուկից մինչև Իսահակյան փողոց – Մաշտոցի պողոտա խաչմերուկ ճանապարհահատվածում երրորդ երթևեկելի գոտին կառանձնացվի միայն հասարակական տրանսպորտի համար, նույնը նաև Մոսկովյան փողոցում՝ Մաշտոցի պողոտայից միչև Աբովյան փողոց:

Մարիաննա Արամյան