Պատժամիջոցները մեր կարմիր գծերն են և մենք սա հստակ ասում ենք ՌԴ-ին․ Փաշինյան
Ուկրաինական իրադարձությունների սկզբից ի վեր բեռնափոխադրումների լոգիստիկ շղթաները կոտրված են կամ չեն գործում։ Բազմաթիվ ապրանքներ, որոնք նախկինում ուղղակիորեն առաքվում էին Ռուսաստան, այժմ այնտեղ են առաքվում Հայաստանով, Ղազախստանով և այլ երկրներով։ Այս մասին չեխական Respekt ամսագրին տված հարցազրույցում ասել է վարչապետ Նիկոլ Փաշինյանը՝ պատասխանելով Ռուսաստանի դեմ պատժամիջոցների վերաբերյալ հարցին՝ հայկական արտահանման ավելացման համատեքստում դեպի Ռուսաստան, փոխանցում է Արմենպրեսը։
«Օրինակ, խմիչքները, որոնք պատժամիջոցների չեն ենթարկվում, խնդիր չեն։ Մինչև 2022 թվականի փետրվարը այն առաքվում էր Լեհաստանով և Բելառուսով, այժմ դրանք առաքվում են Հայաստանով։ Խոսքը միայն երթուղիների փոփոխության մասին չէ, եվրոպական բեռնափոխադրողների մեծ մասը հրաժարվում է ուղղակիորեն համագործակցել ռուսական շուկայի հետ։ Իսկ ռուս բեռնափոխադրողները չեն կարող այն հասցնել Լեհաստան։ Այսպիսով, ստեղծվեցին բոլորովին նոր լոգիստիկ ուղիներ, այդ թվում՝ Հայաստանի տարածքով։ Բայց պատժամիջոցների տակ գտնվող ապրանքների առումով մենք փորձում ենք լինել մաքսիմալ թափանցիկ, համագործակցում ենք ԵՄ-ի, ԱՄՆ-ի, նույնիսկ հենց Ռուսաստանի հետ։ Մենք ԵՏՄ անդամ ենք և շատ սերտ տնտեսական կապեր ունենք Ռուսաստանի հետ, և հայկական բիզնեսը սիրում է մասնակցել այն ծրագրերին, որոնք ստեղծվել են վերջին շրջանում։ Մենք սիրով ընդառաջում ենք ռուսական պահանջարկին, որտեղ ազատ տեղ կա։ Պատժամիջոցները մեր կարմիր գծերն են. Եվ մենք սա հստակ ասում ենք ռուսներին. մենք չենք ուզում ձեզ վիրավորել, բայց մենք չենք կարող մեզ թույլ տալ պատժամիջոցների տակ ընկնել: Այստեղ ոչ մի գաղտնիք չկա»,- ասել է ՀՀ վարչապետը։
