ԵՄ իշխանությունները եվրոպական տնային տնտեսություններին կոչ կանեն մթերք կուտակել ճգնաժամի դեպքում

Եվրամիության (ԵՄ) իշխանությունները եվրոպական տնային տնտեսություններին կոչ կանեն մթերք կուտակել կլիմայական ճգնաժամի կամ պատերազմի դեպքում։ Այս մասին հայտնել է իսպանական «El Pais» թերթը՝ վկայակոչելով մի փաստաթուղթ։

Նոր ռազմավարության մեջ Եվրոպական հանձնաժողովը (ԵՀ) սահմանում է քաղաքացիական պատրաստվածության միջոցառումներ պատերազմի, գլոբալ տաքացման հետևանքով բնական աղետների, համաճարակների կամ կիբերհարձակումների դեպքում:

Փաստաթուղթը նաև նախազգուշացնում է «Եվրոպայի անվտանգության հեռանկարների վատթարացման մասին»: ԵՄ իշխանությունները կոչ են անում քաղաքացիներին ունենալ ջուր, դեղորայք, մարտկոցներ և սնունդ՝ պատրաստ լինելու ճգնաժամի դեպքում 72 ժամ առանց արտաքին օգնության: