Նիկոլ Փաշինյանը կարեւորել է Nvidia-ի կողմից մեր երկրում գիտահետազոտական կենտրոնի հիմնումը
Վարչապետ Նիկոլ Փաշինյանն ընդունել է բարձր տեխնոլոգիական ոլորտում համաշխարհային առաջատարներից մեկի՝ Nvidia ընկերության հիմնադիր եւ գործադիր տնօրեն Ջենսեն Հուանգին: Այս մասին տեղեկանում ենք վարչապետի աշխատակազմից:
Վարչապետը ողջունել է պարոն Հուանգի այցը Հայաստան եւ նշել, որ ջերմությամբ է հիշում 2019 թվականին Սիլիկոնյան հովտում տեղի ունեցած իրենց հանդիպումը: Նիկոլ Փաշինյանը կարեւորել է Nvidia-ի կողմից մեր երկրում գիտահետազոտական կենտրոնի հիմնումը, որի բացումը տեղի է ունեցել նախորդ տարի: Վարչապետը հավելել է, որ ՀՀ կառավարության համար բարձր տեխնոլոգիաների ոլորտը համարվում է առաջնահերթություն եւ գործադիրը շարունակելու է ստեղծել պայմաններ ու հնարավորություններ՝ ՏՏ ոլորտի նորանոր ընկերություններ ներգրավելու համար:
Ջենսեն Հուանգը նշել է, որ տպավորված է Հայաստանով, այստեղ բարձր տեխնոլոգիաների բնագավառում առկա ներուժով ու մարդկային կապիտալով: Nvidia ընկերության հիմնադիրը հավելել է, որ Հայաստանում ՏՏ ոլորտն ունի հետեւողական զարգացման լայն հնարավորություններ ու հեռանկարներ, եւ իրենց ընկերությունը շարունակելու է արդյունավետ գործունեությունը մեր երկրում:
Հանդիպմանը զրուցակիցները քննարկել են ինժեներական կրթության զարգացմանը, բարձր տեխնոլոգիական ոլորտի հետագա առաջընթացին, ինչպես նաեւ ՀՀ կառավարության եւ Nvidia-ի միջեւ համագործակցությանը վերաբերող հարցեր ու ծրագրեր:
