ՔԿ «գնահատականները» ակնհայտ բացասական ստվեր են գցում իմ պաշտպանյալի վրա․ փաստաբան
ՀՀԿ փոխնախագահ Արմեն Աշոտյանի պաշտպան Տիգրան Աթանեսյանը ֆեյսբուքյան իր էջում գրում է․
«ՀՀ քննչական կոմիտեն իր հաղորդագրություններով և տեսահոլովակներով գրեթե ամբողջությամբ բացահայտել է բոլոր փաստական հանգամանքները, որոնք առկա են Արմեն Աշոտյանի քրեական գործով, իհարկե դրանց տալով իրավաբանական գիտության հետ կապ չունեցող գնահատականներ, որոնց ակնհայտ նպատակն է ստվեր գցել իմ պաշտպանյալի վրա և նրան ներկայացնել բացասական լույսի ներքո:
Այս իրողությունն ինձ ստիպում է, առանց նախաքննական արդեն գոյություն չունեցող գաղտնիքը հրապարակելու ռիսկի, մանրամասն անդրադառնալ քրեական գործի/վարույթի հանգամանքներին և ներկայացված «մեղադրանքին», ինչպես նաև, միգուցե, դատարանում Ա.Աշոտյանի կողմից արված բացահայտումներին՝ քննչական կոմիտեի նախագահի և նրա աներորդու գործով անցնող անձանց վրա հնարավոր ազդեցության մասին:
Սակայն պահպանելով փաստաբանական էթիկան, դա կանեմ Ա.Աշոտյանի հետ հարցը քննարկելուց հետո»։
