Կաշառքի գործ է․ ովքե՞ր են Կենտրոնի թաղապետարանի ձերբակալված պաշտոնյաները
Քիչ առաջ Երևանի քաղաքապետի մամուլի քարտուղար Հայկ Կոստանյանը հայտնեց, որ իրավապահ մարմինների կողմից այսօր գործողություններ են իրականացվել Կենտրոն վարչական շրջանի աշխատակազմի առևտրի և սպասարկումների բաժնում, կան ձերբակալվածներ։ Այլ մանրամասներ չնշեց, թե ովքեր են ձերբակալվածները, ինչ գործի շրջանակներում են իրականացվել այդ խուզարկություններն ու ձերբակալությունները։
MediaHub-ը պարզեց, որ խուզարկությունն իրականացվել է Հակակոռուպցիոն կոմիտեի կողմից՝ իրենց մոտ քննվող քրեական վարույթի շրջանակներում։ Կոմիտեից մեզ ասացին, որ ձերբակալված չորս անձանցից 3-ը պաշտոնատար անձինք են, այլ տեղեկատվություն այս պահին չեն կարող տրամադրել` նախաքննության շահերից ելնելով։
Մենք տեղեկացանք, որ ձերբակալված պաշտոնատար անձանցից մեկը Առևտրի և սպասարկման բաժնի պետ Արսեն Աղաբեկյանն է, մյուսը՝ նրա տեղակալը, նաև մեկ այլ աշխատակից։ Նրանք ձերբակալվել են կոռուպցիոն գործարքի կասկածանքով, ասել է թե՝ կաշառքի գործով։
Նշենք, որ Կենտրոն վարչական շրջանի ղեկավարությունը առաջին անգամ չէ, որ հայտնվում է նման պատմության մեջ:
Վահե Մակարյան
