Գողության փորձ կատարած պարեկը ձերբակալվել է
Գյումրեցի իրավապաշտպան Կարապետ Պողոսյանը այսօր հայտնել էր, որ գիշերը պարեկային ծառայության Շիրակի մարզի գումարտակի, առաջին դասակի սպա Ռ. Հայրապետյանն, Աշտարակ խոշորացված համայնքում բռնվել է բնակարանային գողություն կատարելուց։
Քննչական կոմիտեից MediaHub-ին հաստատում են՝ Աշտարակում բնակարանային գողության փորձ կատարելու առնչությամբ քրեական վարույթ է նախաձեռնվել, մեկ անձ ձերբակալվել է։
«Այս պահին գտնվում է բժշկական հաստատությունում, քանի որ բնակարանից գողություն կատարելու փորձի ժամանակ վնասվածքներ է ստացել։ Միեւնույն ժամանակ նույն օրը, նույն բնակավայրում եւ հարակից բնակավայրում այլ անձնանց բնակարաններ ապօրինի մուտք գործելու, գողություն կատարելու վերաբերյալ հաղորդումներ են ստացվել, որոնց կապակցությամբ եւս նախաձեռնվել է քրեական վարույթ»,-ասաց Աբրահամյանը։
Նա հավելեց, որ այս պահին քննություն է իրականացվում՝ դեպքի հանգամանքները պարզելու նպատակով:
Լիա Սարգսյան
