Գոհ եմ. կնպաստեմ, որ Սամվել Բաբայանը դառնա պետնախարար. Գագիկ Մելքոնյան
ՔՊ-ական պատգամավոր, Պաշտպանության նախկին փոխնախարար Գագիկ Մելքոնյանը, որը երկու օր առաջ ասում էր՝ «Հիմի լավ է Զանգեզուրի միջանցք տա՞նք, թե Ռուբենին ասենք թող գնա, որտեղից եկել ես», գոհ է Արայիկ Հարությունյանի որոշումից։
«Շուտվանից կար Ռուբեն Վարդանյանին՝ պետնախարարի պաշտոնից ազատելու որոշումը»,- MediaHub-ի հետ զրույցում ասաց Մելքոնյանը։
Դիտարկմանը՝ արդյո՞ք Արայիկ Հարությունյանն այսպիսով չի կատարել Ալիեւի պահանջը, ՔՊ-ական պատգամավորն ասում է՝ ոչ, չի նշանակում, քանի որ, ըստ նրա, Վարդանյանին ազատելու խոսակցությունները եղել է մինչեւ Ալիեւի հայտարարությունը։
Րոպեներ առաջ Հարությունյանը ստորագրեց Ռուբեն Վարդանյանին պետնախարարի պաշտոնից ազատելու հրամանագիրը։ Ի դեպ, այդպիսի պահանջ էր ներկայացրել Իլհամ Ալիևը։
Ադրբեջանի նախագահը հայտարարել է, որ իրենք պատրաստ են խոսել «Ղարաբաղում ապրող հայերի հետ», բայց ոչ պետնախարար Ռուբեն Վարդանյանի:
-Պարոն Մելքոնյան, Ռուբեն Վարդանյանը հիմա պաշտոնանկ է արվել, սա նշանակում է, որ Ալիեւը այլեւս «Զանգեզուրի միջանցքի» պահանջ չի՞ ներկայացնելու։
- Չգիտեմ, դա դեռ ոչ մեկ չի կարող ասել։
- Իսկ արդյո՞ք Լաչինի միջանցքը շուտով կբացվի։
- Այո, ես կանխատեսում եմ, որ շատ շուտով կբացվի։ Փոփոխություններ է կատարվում անընդհատ։
- Պետնախարարի պաշտոնում ո՞ւմ եք տեսնում։
-Սամվել Բաբայանին։ Կնպաստեմ, որ ինքը դառնա պետնախարար։
Լիա Սարգսյան
