Հացահատիկն այսօր դարձել է նոր ոսկի կամ նավթ. Լուկաշենկո
Բելառուսի նախագահ Ալեքսանդր Լուկաշենկոն կարծում է, որ Ուկրաինայում իրադարձությունների ֆոնին առավել քան երբևէ կարևոր է հաջողությամբ իրականացնել սերմնացանը, քանի որ հացահատիկն այսօր գործնականում դարձել է նոր ոսկի կամ նավթ. գրում է TASS-ը:
«Բելառուսում այս տարի սերմնացանն ավելի կարևոր է, քան երբևէ: Մենք այն անցկացնում ենք մեր հարավային սահմանների երկայնքով թեժ հակամարտության ֆոնին, ինչպես նաև մեր գլխավոր դաշնակցի՝ Ռուսաստանի ու մեր հիմնական շուկայի վրա մեծ պատժամիջոցների ճնշման, աշխարհում ածխաջրածինների, պարարտանյութերի և պարենային ապրանքների գների աննախադեպ թանկացման համատեքստում», - ասել է Բելառուսի նախագահը գարնանային դաշտային աշխատանքների պատրաստության վերաբերյալ հանդիպմանը։
Ըստ նրա՝ «հացահատիկն այսօր գործնականում նոր ոսկի է կամ նավթ»։
«Միգուցե այն նույնիսկ ավելի թանկ լինի: Եվ քանի որ աշխարհի գլխավոր մատակարարներից մեկը՝ Ուկրաինան, դժվար թե կարողանա լիարժեք սերմնացան իրականացնել, գները կշարունակեն աճել», - ասել է Լուկաշենկոն:
