Տեղի բնակիչները չեն տարհանվել․ բոլորն իրենց տանն են․ Ղուլունց

Տեղում ամեն ինչ նորմալ է, կայուն վիճակ է, ոչ մի խնդիր չկա։ Այս մասին այսօր MediaHub-ի հետ զրույցում ասաց Սյունիքի մարզի Տեղ համայնքի ղեկավար Դավիթ Ղուլունցը։ 

Հիշեցնենք, որ ադրբեջանական զինուժը երեկ  կեսօրից հետո կրակ է բացել Տեղ գյուղի հատվածում ինժեներական աշխատանք կատարող հայ զինծառայողների ուղղությամբ: Պաշտպանության նախարարությունից հայտնում են՝ հայկական կողմն ունի 4 զոհ և 6 վիրավոր։ 

ՀՀ ՊՆ-ի փոխանցմամբ՝ գիշերվա ընթացքում հակառակորդի կողմից հրադադարի էական խախտումներ չեն արձանագրվել, ժամը 08-ի դրությամբ իրադրությունն առաջնագծում շարունակում է մնալ հարաբերականորեն կայուն։ 

«Ապրիլի 11-ին ադրբեջանական սադրանքի հետևանքով հայկական կողմը դիրքային որևէ կորուստ չունի։ Երեկ վիրավորում ստացած զինծառայողների առողջական վիճակի փոփոխություն այս պահի դրությամբ չկա՝ 6 զինծառայողներից երեքի վիճակը գնահատվում է բավարար, մյուս երեքինը` համապատասխանաբար միջին ծանրության, ծանր և ծայրահեղ ծանր», - ասված է հաղորդագրության մեջ։

Ղուլունցը հայտնեց, որ գյուղի բնակիչները չեն տարհանվել։ «Բոլորն իրենց տանն են»։

Լիաննա Թորոսյան