2 ժամում մոտ 10000 մարդ հավաքվեց, Մինչ Արցախում կրակում էին, ինչո՞վ էր զբաղված ՀՀ իշխանությունը․ Մամուլը՝ սուրճով
«Հրապարակ» թերթը գրում է.
Հանրապետության հրապարակում երեկ երեկոյան մարդկանց մեծ բազմություն էր հավաքվել: Տարբեր քաղաքական ուժերի ներկայացուցիչները պահանջում էին ՀՀ վարչապետից՝ քայլեր կիրառել Արցախի խաղաղ բնակիչներին ցեղասպանության ենթարկող ադրբեջանցիներից պաշտպանելու համար կամ էլ հրաժարական տալ: Դրան զուգահեռ, ՌԴ դեսպանատան դեմ էր բողոքի ակցիա ընթանում, որն ակնհայտորեն ուղղորդվում էր ՀՀ իշխանությունների կողմից, որպեսզի պատասխանատվության վեկտորը թեքվի դեպի Ռուսաստանի Դաշնություն, որն իր` ռազմավարական դաշնակցի պարտականությունները չի կատարում:
Մերձիշխանական շրջանակներն էլ ամեն կերպ փորձում էին դժգոհության ալիքն ուղղել նախկինների, ռուսների եւ արցախցիների կողմը: Քննչական կոմիտեն հապճեպ հայտնեց, որ Հանրապետության հրապարակում հանրահավաքի մասնակիցների նկատմամբ քրեական վարույթ է նախաձեռնվել` անկարգություններ կազմակերպելու եւ կոչեր անելու փաստով: Հրապարակ էր բերվել «Ալֆա» ջոկատը: Հրապարակի ամբողջ տարածքում խափանված էր ինտերնետ կապը եւ հնարավոր չէր լայվ մտնել: Այս պրիմիտիվ մեթոդներով իշխանությունը փորձում է կանխել բողոքի զանգվածային ալիքը: Հրապարակում, մոտավոր հաշվարկներով, ժամը 21-ի դրությամբ արդեն մոտ 10 հազար մարդ էր հավաքվել:
«Հրապարակ» թերթը գրում է.
«Մինչ Արցախում կրակում էին, եւ իրավիճակը լուրջ էր, Հայաստանում իշխանական ողջ ռեսուրսը կենտրոնացել էր ոչ թե Արցախին օգտակար լինելու, այլ Հայաստանի ներքաղաքական պրոցեսները ցանկալի հուն մղելու ուղղությամբ: Նման դեպքերում միանգամից ակտիվանում են իշխանական ֆեյքերը, որոնք հրահանգավորված սկսում են մեղադրել արցախցիներին ու ընդդիմադիրներին` Արցախի վիճակի համար, դժգոհ մարդկանց ուղղորդել դեպի ռուսներն ու նախկինները, հայհոյել Նիկոլ Փաշինյանին քննադատողներին:
Ասենք, ոչ մի բացատրություն չուներ երեկ Ռուբեն Վարդանյանին հայհոյելը, մեր կայքի մեկնաբանություններում առավոտվանից կազմակերպված հարձակում էր գնում նրա դեմ: Օրվա ընթացքում հայտնվեցին մարդիկ, որոնք ոչ թե կառավարությունից էին ինչ-որ բան պահանջում, այլ Ռուսաստանի դեսպանից ու Պուտինից: Հետո սկսեցին ակտիվորեն տարածել, թե կրակը դադարել է Արցախում, եւ Փաշինյանն է այն դադարեցրել»:
