ԵԽԽՎ մոնիթորինգի հանձնաժողովն առաջարկել է չհաստատել ադրբեջանական պատվիրակության լիազորությունները

Եվրոպայի խորհրդի խորհրդարանական վեհաժողովի մոնիթորինգի հանձնաժողովը երեքշաբթի լիագումար նիստում առաջարկել է չհաստատել ադրբեջանական պատվիրակության լիազորությունները։

Որոշումն ընդունվել է ձայների մեծամասնությամբ՝ բուռն քննարկումներից հետո։

Մոնիթորինգի հանձնաժողովը համարել է, որ ադրբեջանական պատվիրակության լիազորությունները չպետք է հաստատվեն առնվազն մեկ տարի։

Ադրբեջանցի պատգամավորների լիազորությունների դադարեցման հնարավորության մասին հայտնի կդառնա հունվարի 24-ի կայանալիք նիստում։ Լիագումար նիստը կարող է ամբողջությամբ կամ մասնակիորեն սահմանափակել ադրբեջանական պատվիրակության լիազորությունները։

Լիազորությունների սահմանափակումը չի նշանակի Ադրբեջանի մասնակցության դադարեցում Եվրոպայի խորհրդի այլ կառույցներում։ Սահմանափակելու նախաձեռնությամբ նախօրեին հանդես է եկել գերմանացի պատգամավոր Ֆրանկ Շվաբեն։

Որպես պատճառ նա նշել է Ադրբեջանում մարդու իրավունքների շարունակվող խախտումները և քաղբանտարկյալների թվի աճը, Լեռնային Ղարաբաղի դեմ 2023 թ. սեպտեմբերին իրականացված ռազմական ագրեսիան և դրա հետևանքով հարյուր հազարավոր հայերի բռնի տեղահանումը, ինչպես նաև պաշտոնական Բաքվի մերժումը՝ ԵԽԽՎ պատվիրակությանը հրավիրել փետրվարի 7-ին կայանալիք նախագահի ընտրությունը գնահատելու: Նա նաև նշել է, որ Ադրբեջանը թույլ չի տվել ԵԽԽՎ զեկուցողներին 2023 թ. այցելել Լաչինի միջանցք։