Բրիտանացի գիտնականներն աշխարհում առաջին անգամ բուժել են հազվագյուտ մանկական կուրություն
Լոնդոնի բժիշկները դարձել են աշխարհում առաջինը, ովքեր բուժել են հազվագյուտ գենետիկ խանգարումներով ծնված երեխաների կուրությունը՝ օգտագործելով առաջամարտիկ գենային թերապիա, գրել է «The Guardian»-ը։
Այս թերապիան համեմատաբար նոր բուժման մեթոդ է, որը հիմնված է հատկապես երեխաների մոտ լուրջ հիվանդություններ առաջացնող թերի գեների շտկման վրա։ Բուժումն իրականացվում է անսարք գեների շտկմամբ և փոխարինմամբ, որոնք պատասխանատու են որոշ ժառանգական հիվանդությունների զարգացման համար։
2020 թվականին Մուրֆիլդսի ակնային հոսպիտալի և Լոնդոնի համալսարանական քոլեջի մասնագետները վիրահատության համար ընտրել են մեկից երկու տարեկան չորս երեխաների՝ ԱՄՆ-ից, Թուրքիայից և Թունիսից: Երեխաներն ունեցել են բնածին Լեբերի ամաուրոզ՝ ցանցաթաղանթի դիստրոֆիայի ծանր ձև, որն առաջացնում է տեսողության կորուստ՝ AIPL1 գենի թերության պատճառով:
Հիվանդները պաշտոնապես որակվել են ի ծնե կույր։ Այն բանից հետո, երբ բժիշկները նվազագույն ինվազիվ վիրահատության ընթացքում, որը տևել է ընդամենը 60 րոպե, նրանց աչքերին ներարկել են AIPL1 գենի առողջ պատճենները, այժմ երեխաները կարող են տարբերակել ձևերը, գտնել խաղալիքներ, ճանաչել իրենց ծնողների դեմքերը և որոշ դեպքերում նույնիսկ կարդալ ու գրել:
Հաջող փորձից հետո ևս 7 երեխա ստացել է այս բուժումը:
