Իսրայելի բանկը նախաձեռնել է բազային տոկոսադրույքի ամենամեծ աճը վերջին 20 տարվա ընթացքում

Երկուշաբթի Իսրայելի բանկը բարձրացրել է իր բազային տոկոսադրույքը երեք քառորդով, ինչն ամենամեծ աճն է վերջին երկու տասնամյակի ընթացքում, եւ, կարծես, մտադիր է շարունակել այն էլ ավելի բարձրացնել՝ փորձելով զսպել գնաճը, որը 5 տոկոսի է հասել, հաղորդում է Reuters-ը: .

Կենտրոնական բանկը բարձրացրել է իր հիմնական տոկոսադրույքը մինչեւ 2.0 տոկոս՝ 1.25 տոկոսից՝ շարունակելով խստացման ցիկլը, որը սկսվել էր ապրիլին, երբ քաղաքական գործիչներն առաջին անգամ բարձրացրին տոկոսադրույքը 0.1 տոկոսից՝ պատմական ցածր մակարդակ, որը սահմանվել էր COVID-19 համավարակի սկզբում:

75 բազիսային կետով տոկոսադրույքի բարձրացման հավանականությունն աճեց անցյալ շաբաթ, քանի որ տվյալները ցույց տվեցին, որ Իսրայելի տնտեսությունը երկրորդ եռամսյակում աճել է 6.8 տոկոսով, իսկ տարեկան գնաճը հուլիսին 5.2 տոկոսի է հասել, ինչն ամենաբարձրն էր 2008թ. հոկտեմբերից ի վեր:

Կենտրոնական բանկի ղեկավարները հայտարարում են, որ հաստատակամ են գնաճը կառավարության տարեկան 1-3 տոկոս նպատակային ցուցանիշին վերադարձնելու հարցում:

Վերջին անգամ Իսրայելի բանկը տոկոսադրույքը երեք քառորդ կետով նվազեցրել էր 2009-ի սկզբին: Վերջին անգամ այն բարձրացրել էր տոկոսադրույքներն առնվազն այդ չափով 2002-ի կեսերին:

«Իսրայելի տնտեսությունն ուժեղ աճ է ցույց տալիս, որն ուղեկցվում է լարված իրավիճակով աշխատաշուկայում եւ աճող գնաճով,- ասվում է Իսրայելի բանկի հայտարարության մեջ:- Ուստի հանձնաժողովը (դրամավարկային քաղաքականության) որոշել է շարունակել տոկոսադրույքի բարձրացման գործընթացը»։

Բանկի սեփական տնտեսագետները հայտարարել են, որ ակնկալում են, որ հիմնական տոկոսադրույքը 2023 թվականի երկրորդ եռամսյակում 2.75 տոկոս առավելագույնի կհասնի: Եւս մի որոշում նախատեսված է հոկտեմբերի 3-ին՝ նոյեմբերի 1-ին կայանալիք համընդհանուր ընտրություններից առաջ։
Իսրայելում գնաճը դեռ շատ ցածր է արեւմտյան մակարդակից, սակայն գների արագ աճի եւ իսրայելցիների աճող զայրույթի պայմաններում կյանքի գինը գլխավոր խնդիր է դարձել թեկնածուների համար ընտրություններին ընդառաջ։