Աղտոտված օդի պատճառով աշխարհում տարեկան միլիոնավոր մահվան դեպքեր են գրանցվում
Պրոֆեսոր, Ռուսաստանի բնական գիտությունների ակադեմիայի թղթակից անդամ, թունաբան Միխայիլ Կուտուշովը Ura.ru-ին տված հարցազրույցում ասել է, որ ամեն տարի աղտոտված օդի պատճառով մահանում է մոտ յոթ միլիոն մարդ։ Նա բացատրել է, որ մահը տեղի է ունենում բնապահպանական իրավիճակի հետևանքով առաջացած հիվանդությունների պատճառով։
«Շատ մարդիկ տառապում են առողջական խնդիրներից, հատկապես, եթե նրանք ապրում են խոշոր արդյունաբերական օբյեկտների կամ բանուկ մայրուղիների մոտ: Տարեկան մոտավորապես յոթ միլիոն մարդ մահանում է աղտոտված օդից։ Ենթադրվում է, որ ինսուլտների և սրտի այլ հիվանդությունների, թոքերի քաղցկեղի մեկ երրորդը պայմանավորված է շրջակա միջավայրի աղտոտվածությամբ: Հիվանդությունները սկսվում են ասթմայից, բրոնխիտից»,- ասել է մասնագետը։
Նա նշել է, որ քանի որ մարդու թոքերը աշխատում են սրտի հետ միասին, օդի աղտոտվածության դեպքում հիվանդությունները սկսում են սրվել։ Նրա խոսքով՝ հիմնական հիվանդությունը, որը կարող է առաջանալ, քաղցկեղն է։ Բացի այդ, հաճախակի են ասթմայի կամ քրոնիկ բրոնխիտի դեպքերը, նշել է թունաբանը։
Կուտուշովն ընդգծել է, որ բնակիչների համար ամենամեծ վտանգը քաղաքի սահմաններում գտնվող ձեռնարկություններն են, որոնք աշխատում են թունավոր նյութերով։ Նա ասել է է, որ պետք է նման ձեռնարկությունները տեղափոխել քաղաքից դուրս, կանաչապատել քաղաքը, և մարդիկ ավելի շատ ջուր խմեն, ավելի շատ բանջարեղեն ու միրգ ուտեն։