ՆԱՏՕ-ի երեք երկրներ Ուկրաինային են փոխանցում 70 ռազմական ինքնաթիռ
Բուլղարիան, Լեհաստանը և Սլովակիան Ուկրաինային են փոխանցում 70 ռազմական ինքնաթիռ, որոնք կարող են տեղակայվել Լեհաստանի օդանավակայաններում. Facebook-ի իր պաշտոնական էջում հայտնել է Ուկրաինայի ռազմածովային ուժերի մամուլի ծառայությունը։
«70 ինքնաթիռ ուկրաինական բանակի համար: Մեր գործընկերները մեզ տալիս են ՄիԳ-29 և Սու-25: Անհրաժեշտության դեպքում դրանք կարող են տեղակայվել Լեհաստանի օդանավակայաններում, որտեղից ուկրաինացի օդաչուները մարտական առաջադրանքներ կկատարեն», - ասվում է մամուլի ծառայությունում:
Ըստ այդմ՝ Բուլղարիան Ուկրաինա է տեղափոխում 16 ՄիԳ-29 կործանիչ և 14 Սու-25 գրոհային ինքնաթիռ, Լեհաստանը՝ 28 ՄիԳ-29 ինքնաթիռ, Սլովակիան՝ 12 ՄիԳ-29։
ԵՄ արտաքին գործերի և անվտանգության քաղաքականության հարցերով ներկայացուցիչ Ժոզեպ Բորելը հայտարարել է, որ ԵՄ արտգործնախարարները համաձայնել են Ուկրաինային տրամադրել 450 միլիոն եվրոյի մահաբեր զենք, Բորելը նաև ասել է, որ ԵՄ-ն ռազմական ինքնաթիռներ կմատակարարի Ուկրաինային։
Սակայն երկուշաբթի օրը ճեպազրույցի ժամանակ Բուլղարիայի վարչապետ Կիրիլ Պետկովը հայտարարել է, որ մտադիր չէ ինքնաթիռներ ուղարկել Ուկրաինա։
«Մենք քիչ թվով ինքնաթիռներ ունենք, և դրանք ոչ մեկին չենք կարող փոխանցել, դրանց թիվը բացարձակապես բավարար չէ մեր երկինքը պաշտպանելու համար, և այն պնդումը, որ մենք կտանք այս պահին, անհեթեթ է», - ասել է քաղաքական գործիչը։
