Գալյանին հեռացրել են չատից. Հերթական կասկածելի քայլը, այս անգամ Չինաստանի դեմ. Մամուլը՝ սուրճով

«Հրապարակ» թերթը գրում է. «Արդարադատության նախարար Սրբուհի Գալյանը 2008-2012 թվականներին սովորել և ավարտել է Երևանի պետական համալսարանի իրավագիտության ֆակուլտետը, իսկ  2016-2017 թվականներին սովորել է Փաստաբանների դպրոցում եւ փաստաբանի լիցենզիա է ստացել, սակայն որպես փաստաբան չի աշխատել: 2015-2018 թվականներին նա արդեն աշխատելիս է եղել ՀՀ հատուկ քննչական ծառայությունում, որպես գլխավոր մասնագետ:

Մեզ պատմեցին, որ Փաստաբանական դպրոցի կուրսեցիներով «չատ» են ունեցել, որտեղ երկար տարիներ շփվել են միմյանց հետ: Սակայն Սրբուհի Գալյանի նախարար նշանակվելուց հետո համակուրսեցիները նրան հեռացրել են «չատից»: Պաշտոնական պատճառը եղել է մի լուսանկար` Աննա Հակոբյանի հետ:

Փաստաբանները գտել են, որ Աննայի ընկերուհին չի կարող իրենց «չատի» անդամ լինել եւ մասնակցել իրենց զրույցներին: Ի դեպ, երբ Գալյանին լրագրողները ասուլիսի ժամանակ հարցրել էին` արդյո՞ք ինքը Աննա Հակոբյանի ընկերուհին է, ինչ հարաբերություններ կան նրանց միջեւ: Նա ասել էր` միայն աշխատանքային հարաբերություններ:

Սակայն որպես իրավաբան, նա պետք է լավ իմանա, որ աշխատանքային հարաբերությունները կարգավորվում են օրենքով, նման հարաբերություններ կարող են ծագել գործատուի եւ աշխատողի, կամ աշխատակիցների միջեւ, իսկ Աննա Հակոբյանը ոչ Գալյանի վերադասն է, ոչ պետական պաշտոն է զբաղեցնում, վարչապետի կինը լինելը դեռ պաշտոն չէ եւ նրանց միջեւ չեն կարող աշխատանքային հարաբերություններ լինել»:

«Ժողովուրդ» օրաթերթը գրում է. «Արձակուրդում գտնվող Տիգրան Ավինյանը կոնսոլիդացրել է բարձրագույն իշխանությանը՝ տրանսպորտի թանկացման արշավում: Բայց ողջ իշխանությունը միասին վերցված չեն կարողանում իրենց աշխատանքով մեղմել հանրության զայրույթը:

Հիշեցնենք, որ մինչ արձակուրդի մեկնելը Երեւանի քաղաքապետ Տիգրան Ավինյանը, Կառավարության դիմաց պատասխանելով լրագրողների հարցերին, թե ինչու Նիկոլ Փաշինյանը տեսակետ չի հայտնում տրանսպորտի թանկացման վերաբերյալ, ասել էր, թե Փաշինյանն իր տեսակետը կհնչեցնի: Եվ ահա չուշացավ «հրահանգը»։ Փաշինյանը ընտանեկան փոդքաստով, ապա տարբեր հրապարակումներով փորձում է հանրությանը համոզել, որ 100 դրամի թանկացումը խիստ անհրաժեշտություն է:

Անգամ ԱԺ նախագահ Ալեն Սիմոնյանը միացավ արշավին և նույնիսկ անտրամաբանական հարցով փորձեց օգնել Ավինյանին՝ քննադատելով երբեմնի մտերիմ ընկերոջը՝ Հայկ Մարությանին. «Ինչո՞ւ մտահոգներով չեք հավաքվում, բողոքի ձայն բարձրացնում 20.000 դրամանոց մոնոներկայացումների դեմ: Ասենք` պահանջենք, որ 20.000 դրամանոց մոնոներկայացումը դառնա 100 դրամ»,- գրեց երկրի խորհրդարանի ղեկավարը: Տպավորություն է, որ նախկին պրոդյուսեր Ալեն Սիմոնյանը դեռ իր հին դերում է եւ մի փոքր նախանձ ունի Հայկ Մարությանի արագ սպառվող թանկարժեք տոմսերի կապակցությամբ. զուտ մրցակցային «նախանձ»։

Իսկ ավելի լուրջ, պետք է ասել, որ որքան մոտենում է փետրվարի 1-ը, այնքան խնդրահարույց է դառնում տրանսպորտի նոր սակագների կիրառումը, քանի որ հանրության լայն շերտերի շրջանում թանկ սակագնի դեմ բոյկոտելու տրամադրություն է տիրում:

Ի դեպ, ՔՊ պատգամավորները, որ Ավինյանի նախընտրական քարոզարշավի օրերին փողոցներն ընկած քարոզչություն էին անում, նույն ոգեւորությամբ չեն ընկել փողոցները ու չեն բացատրում, որ տրանսպորտի թանկացումը պետության համար շատ կարեւոր է»:

«Հրապարակ» թերթը գրում է. «Թեպետ իշխանական քարոզչամեքենան թմբկահարում է Նիկոլ Փաշինյանի ԱՄՆ կատարելիք այցը, որը նախատեսվում է փետրվարի սկզբին՝ դա ներկայացնելով ՀՀ իշխանությունների նկատմամբ ԱՄՆ նորընտիր վարչակարգի աջակցություն, սակայն իրականում Փաշինյանը ԱՄՆ է մեկնում մասնակցելու Միջազգային կրոնական ազատության գագաթնաժողովին եւ «Ազգային աղոթքի նախաճաշին»:

Այդ գագաթնաժողովն անցկացվում է հինգերորդ անգամ, սակայ որին գրեթե ոչ մի լուրջ երկրի ղեկավար չի մասնակցում: Հնարավո՞ր է` ԱՄՆ այցի ընթացքում հանդիպում կայանա նախագահ Դոնալդ Թրամփի հետ, վարչապետի խոսնակի հաղորդագրության մեջ այդ մասին մանրամասներ չկան: Հայաստանը Կրոնական ազատության ալյանսին միացել է 2019 թվականին, հենց Թրամփի նախագահության շրջանում: Այս ֆորմատը ձեւավորվել է ընդդեմ Չինաստանի։ Այնպես որ այս մասնակցությունը կարող է ոչինչ չտալ, բայց կարող է մեզ համար նոր լուրջ պրոբլեմներ առաջացնել»:

«Հրապարակ» օրաթերթը գրում է․ ՀՀ իշխանությունների կողմից ԵՄ-ին անդամակցելու գործընթացի առջեւ կանաչ լույս վառելուց անմիջապես հետո Ռուսաստանից հնչող նախազգուշացումները, ըստ լուրերի, ավելի գործնական տեսք են ստացել՝ թեեւ դեռեւս լոկալ մակարդակում: Օրինակ, սահմանափակել են որոշ ապրանքների ներմուծումն ու արտահանումը Ռուսաստան։ 

Տեղեկություններ կան, որ վերջին շաբաթներին ոսկու արտահանման ծավալներն են էականորեն կրճատել, հայտնի է, որ ՌԴ-ի դեմ եվրոպական պատժամիջոցներից հետո Հայաստանի ոսկու շուկայում աննախադեպ ակտիվություն կար` Ռուսաստանից վերաարտահանման հետ կապված, ինչն էլ իր հերթին բարձր տնտեսական ցուցանիշներ էր ապահովում` բյուջեի մեծ մուտքեր։

Հայաստանը ներմուծում է ռուսական ոսկին, ապա զարդերի տեսքով արտահանում Արաբական Միացյալ էմիրություններ եւ այլ երկրներ։ Դիցուք՝ 2023-ին արտահանված ոսկու ընդհանուր արժեքը կազմել է 1.8 միլիարդ դոլար, որը 2022 թվականի համեմատ 4.4 անգամ աճել է։ 2024-ին այդ ցուցանիշը գրեթե քառապատկվել է։ Ոսկերչական արտադրանքի կտրուկ աճը ապահովել է մեկ ընկերություն՝ «Երևանի ոսկերչական ֆաբրիկան», որը փոխկապակցված է ՔՊ-ական պատգամավոր, գործարար Խաչատուր Սուքիասյանի ընտանիքի և նրանց պատկանող «Սիլ կապիտալ» խմբի հետ: