Գիտնականները բացատրել են, թե ինչպես են սթրեսը և ալկոհոլն ազդում միմյանց վրա
Սթրեսը դարձել է ժամանակակից կյանքի անբաժանելի մասը և էականորեն ազդում է մեր ֆիզիկական և հոգեկան առողջության վրա: Մասնագետներն ընդգծում են, որ խրոնիկական սթրեսի ամենալուրջ հետեւանքներից է ալկոհոլիզմի զարգացման վտանգը, գրել է «РБК Вино»-ը։
Հոգեբույժ-նարկոլոգ Ռուսլան Իսաևը նշել է, որ սթրեսից ազատվելու և ալկոհոլի օգտագործման միջև կապը ձևավորվում է վաղ փուլերում, երբ մարդիկ սկսում են ալկոհոլ օգտագործել իրենց հոգե-էմոցիոնալ վիճակը փոխելու համար։ «Էթիլային ալկոհոլն ազդում է մարմնի բոլոր համակարգերի վրա, ներառյալ նյարդային հաղորդիչների արտադրությունը, ինչպիսիք են դոֆամինն ու սերոտոնինը: Հանգստությունն ու կարճաժամկետ հակադեպրեսանտ էֆեկտն արագ է ի հայտ գալիս, և խնդիրները, կարծես թե, նահանջում են»,- բացատրել է մասնագետը։
Այնուամենայնիվ, ժամանակի ընթացքում մարմինը սկսում է հարմարվել ալկոհոլին, ինչը հանգեցնում է նույն ազդեցության հասնելու համար դոզան ավելացնելու անհրաժեշտությանը: Այս մասին զգուշացրել է ՌԴ Պրակտիկ սոցիալական հոգեբանության ինստիտուտի ղեկավար Ալեքսանդր Շախովը։ Այս երեւույթը հանգեցնում է ինչպես ֆիզիկական, այնպես էլ հոգեբանական կախվածության ձեւավորմանը։
«Նեյրոհաղորդիչների աճն ի վերջո կհանգեցնի դեֆիցիտի: Երբ դուք դադարեցնում եք խմելը, դեպրեսիան, անհանգստությունն ու մեղքի զգացումը մեծանում են, և դուք սկսում եք ավելի վատ զգալ, քան նախկինում փորձել եք հաղթահարել սթրեսը ալկոհոլով: Հիշելով խմելուց հետո դրական զգացմունքները, դուք նորից օգտագործում եք՝ կրկին ընկնելով արատավոր շրջանի մեջ»,- ավելացնում է Իսաևը։
Մասնագետները կոչ են անում մարդկանց ուշադիր լինել իրենց հոգե-հուզական վիճակի նկատմամբ և փնտրել սթրեսը կառավարելու այլընտրանքային ուղիներ՝ ալկոհոլի հետ կապված հնարավոր ռիսկերից խուսափելու համար:
