Թրամփը մերժում է տվյալների արտահոսքի սկանդալից հետո Հեգսեթի հնարավոր հրաժարականի գաղափարը
ԱՄՆ նախագահ Դոնալդ Թրամփը մերժել է այն գաղափարը, որ պաշտպանության նախարար Փիթ Հեգսեթը պետք է մտածի հեռանալու մասին Եմենում ԱՄՆ ռազմական հարվածների վերաբերյալ տվյալների արտահոսքի սկանդալից հետո։
«Հեգսեթը հիանալի աշխատանք է կատարում, նա այս ամենի հետ կապ չուներ», - ասել է Թրամփը չորեքշաբթի օրը Սպիտակ տանը լրագրողների հարցին ի պատասխան։
«Ինչպե՞ս եք Հեգսեթին ներքաշում դրա մեջ, նա դրա հետ կապ չունի, այս ամենը վհուկների որս է»,- ընդգծել է ամերիկացի առաջնորդը։
Մարտի 24-ին The Atlantic ամսագրի գլխավոր խմբագիր Ջեֆրի Գոլդբերգը հոդված էր հրապարակել, որում նշել էր, որ մարտի 11-ին Signal մեսենջերին միանալու հարցում է ստացել Մայք Ուոլց մականունով (Ամերիկայի նախագահի ազգային անվտանգության գծով օգնականի անունը) օգտատերից։ Երկու օր անց լրագրողը ծանուցում է ստացել խմբակային չաթում ընդգրկվելու մասին, որտեղ ԱՄՆ վարչակազմի անդամները քննարկել են Եմենին հարվածներ հասցնելը։
Ըստ լրագրողի՝ մարտի 15-ին Փիթ Հեգսեթ անունով օգտատերը հաղորդագրություն է հրապարակել, որը պարունակում է Եմենում հութիների դեմ առաջիկա հարվածների մանրամասները՝ ներառյալ թիրախները, զենքերը և հարվածների մեկնարկի սպասվող ժամանակը, որը, ըստ Գոլդբերգի, համընկել է ռմբակոծությունների մասին սոցիալական մեդիայի հաղորդագրությունների առաջին հրապարակման ժամանակին:
Թրամփն ասել է, որ խումբը գաղտնի տեղեկատվություն չի հրապարակել։ Նա նշել է, որ վստահում է իր ազգային անվտանգության թիմի անդամներին, այդ թվում՝ Ուոլցին, չնայած տվյալների արտահոսքի սկանդալին։ Ուոլցն իր հերթին նշել է, որ չգիտի, թե ինչու է Գոլդբերգը ներառվել փակ խմբում։
