Բուսական այս դեղամիջոցը դիաբետիկների մոտ արդյունավետորեն նվազեցնում է գլյուկոզայի մակարդակը

Չինացի գիտնականները փորձարկել են բուսական դեղամիջոց, որը կարող է կայունացնել արյան գլյուկոզի մակարդակը 2-րդ տիպի շաքարախտով հիվանդների մոտ: Կլինիկական փորձարկումներում դեղամիջոցը ցույց է տվել նյութափոխանակության արագության զգալի բարելավում ընդամենը երեք ամիս անց, հաղորդել է «New Atlas»-ը:

HTD1801 դեղամիջոցը հիմնված է բերբերինի վրա՝ բնական ալկալոիդ, որն օգտագործվում է ավանդական չինական բժշկության մեջ բորբոքային հիվանդությունների և մարսողական խանգարումների համար: Նոր հետազոտության ընթացքում Պեկինի համալսարանի գիտնականները փորձարկել են դրա ազդեցությունը շաքարախտով հիվանդների վրա:

Փորձին մասնակցել է 113 կամավոր։ Նրանց գլիկացված հեմոգլոբինի մակարդակը սկզբում տատանվում էր 7-ից 11 տոկոսի սահմաններում, ինչը վկայում է ածխաջրերի նյութափոխանակության զգալի խանգարումների մասին: HTD1801 կանոնավոր ընդունելուց 12 շաբաթ անց մասնակիցների մեծամասնության մոտ մակարդակը հասել է 6,5 տոկոսից ցածր՝ մոտենալով նորմալ և նախադիաբետի սահմանին: Լավագույն արդյունքները նկատվել են նրանց մոտ, ովքեր ստացել են 1000 մգ դեղաչափ:

Բացի արյան շաքարը կայունացնելուց, հիվանդները նկատել են «վատ» խոլեստերինի և բորբոքային մարկերների ավելի ցածր մակարդակ, ինչպես նաև բարելավվեցին սրտանոթային հիվանդությունների հետ կապված մարկերները: Կարևոր է, որ մասնակիցները չեն գիրացել, ինչը տարբերում է «HTD1801»-ը շաքարախտի բուժման որոշ այլ մեթոդներից:

Հետազոտողները նշել են, որ դեղամիջոցը կարող է օգտագործվել որպես ինքնուրույն բուժում կամ բուժման այլ մեթոդների հետ համատեղ: Նրանք ներկայումս շարունակում են կլինիկական փորձարկումները, որոնք ներառում են հիվանդների ավելի մեծ ընտրանք: