Նոր խնդիր. Արցախում պահանջում են կոմունալները վճարել, այլապես կանջատեն հոսանքն ու գազը
Արդեն տաս օր է, ինչ Արցախը շրջափակման մեջ է և կտրված աշխարհից:
Բազմաթիվ խնդիրներին գումարվել է ևս մեկը՝ եկել է կոմունալները վճարելու ժամանակը, սակայն, ինչպես MediaHub-ն ավելի վաղ գրել էր, մարդկանց ձեռքին գումար չկա՝ բանկոմատները դատարկ են:
Արցախի Մարտակերտից MediaHub-ին ահազանգում են՝ կոմունալների վճարումների ժամանակն է և իրենք կանգնել են լուրջ խնդրի առաջ.
«Էլեկտրաէներգիայի և գազի վճարումները պահանջում են, որ վճարենք: Բայց ո՞նց վճարենք, եթե ձեռքներիս գումար չկա: Բանկոմատները դատարկ են, բանկը գումար չի տալիս կամ տալիս է խիստ սահմանափակ քանակությամբ, ինչպե՞ս պիտի վճարենք: Էլեկտրիկն էլ եկել ասում է՝ կանջատեմ, եթե վճարումները ժամանակին չանեք: Էս վիճակներից մենակ դա է մեզ պակաս»,- նշում է մեր զրուցակիցը:
Նրա խոսքով, խնդիրների մի ողջ ներկապնակ է. կոմունալների վճարումները պահանջում են, բայց, օրինակ, կենսաթոշակառուների մի մասն է միայն թոշակ ստացել, իսկ երեխաների նպաստը և զինվորական թոշակները դեռ մարդկանց չեն տրվել ու որևէ մեկը հստակ չի ասում, թե երբ կլինի:
«Բանկոմատները չեն աշխատում, միայն «Արցախբանկն» է աշխատում, էն էլ սահմանափակ քանակությամբ է մարդկանց գումար տալիս՝ 50 000 դրամ:
«Հայբիզնեսբանկն» էլ է մեկ էլ աշխատում, ենթադրում եմ, որ ֆինանսական դեռ ռեսուրս ունի, որովհետև ռուս խաղաղապահները միայն այս բանկով են կանխիկացնում իրենց գումարները»,- ասաց մեր զրուցակիցը:
Նա նաև նշեց, որ սննդի խնդիրն էլ արդեն բավականին իրեն զգացնել է տալիս՝ նույն Մարտակերտում արդեն շաքարավազի և առաջին այլ անհրաժեշտության ապրանքների խնդիր կա:
«Փողի խնդիր կա, մի հատ էլ բլոկադայի մեջ գտնվող երկրում կոմունալ վճարենք, ո՞նց: Ոնց կարան նման պահանջ մեզ հիմա ներկայացնեն ես դա չեմ հասկանում: Բա էս մարդիկ մեղկ չեն»,- հավելեց նա:
