Մակրոնն ու Սթարմերը ցանկանում են համոզել Թրամփին թե՛ Ռուսաստանի, թե՛ խաղաղապահ առաքելության հարցով

Ֆրանսիայի նախագահ Էմանուել Մակրոնը և Մեծ Բրիտանիայի վարչապետ Քիր Սթարմերը կփորձեն համոզել ԱՄՆ նախագահ Դոնալդ Թրամփին հրաժարվել ուկրաինական հակամարտության կարգավորման շուրջ Ռուսաստանի հետ բանակցություններից՝ Ուկրաինայի ապագա անվտանգության ապահովման եվրոպական պարտավորությունների դիմաց։ Այս մասին գրել է Times թերթը՝ վկայակոչելով դիվանագիտական ​​աղբյուրներ։

Երկու երկրների ղեկավարները պայմանավորվել են համակարգել իրենց մոտեցումները եւ փորձել ազդել Թրամփի՝ հակամարտությունը դադարեցնելու ծրագրերի վրա։

Մակրոնի այցը Վաշինգտոն կկայանա երկուշաբթի օրը, Սթարմերը հինգշաբթի կայցելի ԱՄՆ։

Փետրվարի 18-ին Սաուդյան Արաբիայի մայրաքաղաքում ռուսական և ամերիկյան պատվիրակությունները բանակցություններ են վարել, որոնք տեւել են մոտ 4,5 ժամ։ Հանդիպմանը Ռուսաստանը ներկայացրել են արտաքին գործերի նախարար Սերգեյ Լավրովը, նախագահի օգնական Յուրի Ուշակովը և Ռուսաստանի ուղղակի ներդրումների հիմնադրամի ղեկավար Կիրիլ Դմիտրեւը։

Բանակցություններին ԱՄՆ-ը ներկայացրել են պետքարտուղար Մարկո Ռուբիոն, ազգային անվտանգության հարցերով խորհրդական Մայք Վալցը և ԱՄՆ առաջնորդի հատուկ բանագնաց Սթիվեն Վիտկոֆֆը։

Մակրոնը և Սթարմերը նաև Վաշինգտոնում կփորձեն համոզել ԱՄՆ նախագահ Դոնալդ Թրամփին սահմանափակ ռազմական աջակցություն ցուցաբերել եվրոպական խաղաղապահ ուժերին, որոնք կտեղակայվեն Ուկրաինայում, եթե պատերազմը դադարեցնելու համաձայնություն ձեռք բերվի, հաղորդել է «The Wall Street Journal»-ը՝ հղում անելով իր աղբյուրներին։