Ես ուզում եմ այդ խաղաղության պայմանագիրը լինի. Խաչատուր Սուքիասյան

Հայաստանը պետք է ակտիվացնի ինտեգրացիոն գործընթացները ԵԱՏՄ հարթակում, ինչպես նաև բացի սահմանը Թուրքիայի հետ, ինչը մեր երկրին միայն օգուտներ կբերի: Այս մասին MediaHub-ի և «Սպուտնիկ Արմենիայի» հետ զրույցում ասաց ԱԺ ՔՊ խմբակցության պատգամավոր Խաչատուր Սուքիասյանը:

-Պարոն Սուքիասյան, ԵԱՏՄ-ին մեր մասնակցությունը և վերջին մեկ տարվա հայտնի իրադարձությունները՝ ռելոկանտների գալը ՀՀ և Ռուսաստանի դեմ պատժամիջոցները մեզ համար որոշակի պատուհան է սռեղծել տնտեսական աճի զարգացման իմաստով։ Մյուս կողմից, Արևմուտքը գնալով, կարծես թե, դաշտը մեզ համար նեղացնում է, Ձեր գնահատմամբ, սա ինչ-որ պահի կարո՞ղ է մեզ հասցնել կարմիր գծերի, որից հետո մեզ համար կվատանա իրավիճակը։   

-Մենք չպետք է միայն այս մեկ տարով փոփոխությունները գնահատենք, այլ ավելի խորը պետք է դիտենք։ Որովհետև տնտեսությունը ամիսներով կամ տարով չի գնահատվում, գնահատվում է, թե ինչ հիմքեր ես դնում։ Նախ, որպես եվրասիական հարթակ պետք է ինտրեգրացիան ավելի մեծացնել, փոխկապակցված պետք է լինի տնտեսությունները։ Ի վերջո, ինչի՞ համար է ստեղծվել այդ տնտեսական հարթակը։ Ստեղծվել է, որ արդյունավետ լինի և՛ մեր, և՛ այն երկրների համար, որոնք դրա մասն են կազմում։ Ռելոկանտների գալով մենք մեծ մասը ունեցել ենք եկամտահարկի մասով եկամուտներ։ Այն էլ կազմակերպությունների մասով, որոնք գրանցվել են որպես կազմակերպություն, իսկ անհատները շատ ավելի չնչին գումարներ են վճարել։ Եթե խոսքն այն մասին է, որ շատ ապրանքատեսակներ ՌԴ-ի շուկայից դուրս են եկել,և դրանց փոխարեն պետք է Եվրասիական շուկայի արտադրանքները լինեն, այո՛, այդպիսի բան կա։ Հայկական ապրանքները ինչ-որ ծավալով ավելանում են, ոչ միայն հայկական, այլ երկրների ապրանքները նունպես փոխարինում են նախկին եվրոպական ապրանքներին։ Սա  տնտեսական հարթակ է, հավասարակշռված պիտի լինի ամեն ինչը, հաշվի առնելով այն հանգամանքը, որ մենք նոր որոշում չենք կայացրել։ Մենք այդ համակարգում եղել ենք, կանք, լինելու ենք։

-Կառավարության որոշմամբ մի շարք ապրանքների արտահանումը արգելվել է, սա այդ պատժամիջոցների ճնշման հետևանքո՞վ է։

-Ես չգիտեմ, դուք պետք է ասեք, որ ապրանքատեսակների մասին է խոսքը: Բայց ես չեմ կարծում, որ դա ճնշման արդյունք է, որովհետև Հայաստանն ինչ արտադրում է, իրավունք ունի արտահանելու։ Դրսից ներմուծվող ապրանքների արտահանման մասով հնարավոր է լինեն փոփոխություններ՝ հաշվի առնելով այն, որ այդ արտադրանքները պատժամիջոցների տակ են։

-Պարոն, Սուքիասյան, Դուք ասում եք, որ մենք  պետք է եվրասիական համագործակցությունն ընդլայնենք, բայց, կարծես թե, Հայաստանի իշխանությունները հակառակ քաղաքականությունն են վարում և մենք հեռվանում ենք Ռուսաստանից, այդ թվում նաև տնտեսական առումով: Հակասություն չե՞ք տեսնում։

-Ձեր ասածը ես ենթադրություն եմ համարում։ Առաջինը, պետք է նայենք վիճակագրությանը, և երբ վիճակագրությունը նայում ենք, տեսնում ենք, որ այդպիսի բան չկա։ Եթե նայում ենք քաղաքական հարթակներում, առավել ևս չկա։

-Մոտ մեկ ամիս առաջ Թուրքիան արգելեց հայկական ավիաընկերությունների թռիչքը իր օդային տարածքով։ Նաև Ձեր ընտանիքի հետ փոխկապակցված ավիաընկերությունն է այդ ցանկում։ Ի՞նչ լուծումներ եք տեսնում։    

-Ես ինքս բիզնեսով չեմ զբաղվում, հնարավոր է լսեմ ուղղակի, պատմեն, ասեն՝ ինչ խնդիր կա։ Ես կարծում եմ դա ՀՀ տրանսպորտի նախարորության, իշխանության խնդիրն է։

-Դուք նախկինի պես հիմա և՞ս ակտիվ կողմնակից եք Թուրքիայի հետ սահմանի բացմանը։

-Հայաստանի Հանրապտությունը աշխարհագրական դիրք ունի, ունի հարևաններ, որոնց միջոցով Հայաստանը նույն պայմաններով պիտի օգտվի։ Երբ Հայաստանը չի օգտվում, ապա վնաս է կրում, որովհետև Թուրքիան իր բոլոր սահմանները օգտագործում է։ Հայաստանը Թուրքիայի հետ ունի մեծ սահման, որը չի օգտագործում և այդ բարիքներից չի օգտվում. դա իմ երկրին շատ մեծ օգուտ է:

-Քիշնևում այսօր հնգակողմ հանդիպում է նախատեսված, Դուք ի՞նչ սպասելիքներ ունեք, Ձեր կարծիքով խաղաղաության պայմանագիրը ի վերջո այսօր կստորագրվ, թե՝ ոչ։

-Ես չեմ կարող ասել, դա ինստիտուտներն են աշխատում ՝ արտաքին գործերի նախարարությունը, կառավարությունը։

-Իսկ Ձեր ակնկալիքը այդ հանդիպումից։

-Ես ուզում եմ, որ այդ խաղաղության պայմանագիրը լինի, թե երբ կլինի՝ չգիտեմ։