Կառավարությունը ավելի քան 60 մլն եվրո վարկ կվերցնի, որ Երևանում ճանապարհ կառուցի
Հայաստանի Հանրապետությունը Ասիական զարգացման բանկից վարկ կվերցնի, որ իրականացնի «Երևանի քաղաքային զարգացման ներդրումային ծրագիր»։ Դրա համար Հայաստանի և Ասիական զարգացման բանկի միջև կնքվելու է վարկային համաձայնագիր, որի վերաբերյալ համապատասխան որոշումն այսօր ընդգրկվել է ՀՀ կառավարության հերթական նիստի՝ չզեկուցվող հարցերի փաթեթում։
Համաձայնագրով նախատեսված գումարը կազմում է 60 մլն 90 հազար եվրոյի չափով վարկ, ընդ որում՝ նշված գումարը կարող է ժամանակ առ ժամանակ փոխարկվել Արժույթի փոխարկման միջոցով՝ Համաձայնագրի դրույթներին համապատասխան: Այս գումարով նախատեսվում է կառուցել Իսակով-Արշակունյաց ճանապարհահատվածը, որը միմյանց կկապի Երևան քաղաքի մի քանի վարչական շրջաններ՝ իր վրա վերցնելով տրանսպորտային մեծ հոսքեր և նվազեցնելով խցանումները։
Վարկի փակման ամսաթիվ է համարվում 2028թ. մարտի 31-ը կամ այն ամսաթիվը, որը ժամանակ առ ժամանակ կարող է համաձայնեցվել Վարկառուի և ԱԶԲ-ի միջև:
