Գլխավոր դատախազ Աննա Վարդապետյանը նոր տեղակալ ունի
Ինչպես Mediahub-ը շաբաթ օրը գրել էր, Դատախազությունում նոր կադրային փոփոխություններ էին սպասվում, որի արդյունքում Երևան քաղաքի դատախազ Լիլիթ Գրիգորյանը նշանակվելու էր գլխավոր դատախազի տեղակալ։
Այսօր, Գլխավոր դատախազ Աննա Վարդապետյանի նախագահությամբ տեղի է ունեցել Կոլեգիայի նիստ, որի ընթացքում քննարկվել է ՀՀ գլխավոր դատախազի տեղակալ նշանակելու հարցը:
Աննա Վարդապետյանը, համաձայն «Դատախազության մասին» օրենքի 36-րդ հոդվածի 3-րդ մասով սահմանված կարգի, Կոլեգիայի անդամներին է ներկայացրել Երևան քաղաքի դատախազ Լիլիթ Գրիգորյանի թեկնածությունը:
Հանրապետության գլխավոր դատախազը բարձր է գնահատել թեկնածուի մասնագիտական և մարդկային հատկանիշները, համակարգում անցած ճանապարհը և ևս մեկ անգամ ընդգծել իր կողմից Դատախազությունում բարձր պաշտոններում կատարվող նշանակումների տրամաբանությունը. «Նշանակումները կատարում եմ երկար տարիներ Դատախազությունում ծառայած, փորձ ունեցող այն աշխատակիցներից, որոնք անկախ անձերից, ժամանակներից և իրավիճակներից հավատարիմ են եղել իրենց մասնագիտությանը, իրենց առաքելությանն ու մեր հայրենիքին»:
Կոլեգիայի անդամները դրական կարծիք են հայտնել Լիլիթ Գրիգորյանի թեկնածության վերաբերյալ՝ կարևորելով նրա պրոֆեսիոնալիզմը, աշխատանքի նկատմամբ նվիրվածությունն ու պատասխանատու լինելը:
Գլխավոր դատախազի տեղակալի թեկնածու Լիլիթ Գրիգորյանը շնորհակալություն է հայտնել ՀՀ գլխավոր դատախազին վստահության համար և ընդգծել, որ պատրաստ է ավելի մեծ պատասխանատվությամբ կատարել իր աշխատանքը:
Կոլեգիայի նիստից հետո գլխավոր դատախազ Աննա Վարդապետյանի հրամանով՝ Լիլիթ Գրիգորյանը նշանակվել է ՀՀ գլխավոր դատախազի տեղակալ:
Հիշեցնենք նաև, որ MediaHub-ի աղբյուրների փոխանցմամբ՝ Երևանի դատախազի պաշտոնում Լիլիթ Գրիգորյանին կփոխարինի ՀՀ գլխավոր դատախազության ավագ դատախազ Վարուժան Ղահրամանյանը: Վերջինս Արմավիրի նախկին մարզպետ, կարկառուն ՀՀԿ-ական Աշոտ Ղահրամանյանի եղբորորդին է:
