Հարի Փոթերը վերադառնում է մեծ էկրան

MediaHub-ի ջանքերով՝ այս Ամանորին փոթերասերներին մեծ անակնկալ է սպասվում:

Մեր խմբագրությանը, որը ևս մեծամասամբ փոթերասեր է, բազմաթիվ քաղաքացիներ են դիմել՝ առաջարկելով դիմել երևանյան կինոթատրոններին և առաջարկել մեծ էկրան՝ ընդամենը մի քանի օրով, վերադարձնել ամենասիրելի հերոսներին:

Ի վերջո, «Հարի Փոթերի» ու նրա ընկերների մասին ֆիլմերը կախարդանքի և մանկական երազի մթնոլորտ են պարգևում և հատկապես ամանորյա տոներին  շատ սպասված են:

MediaHub-ը դեռ երեկ «Մոսկվա» կինոթատրոնի աշխատակազմի հետ կապ հաստատեց և հետաքրքրվեց՝ հնարավոր համարո՞ւմ են, ընդառաջելով բազմաթիվ քաղաքացիների խնդրանքներին, Ամանորին ընդառաջ հեքիաթի շունչ պարունակող Հարի Փոթերին վերադարձնել մեծ էկրան։ 
Եվ ահա, կամ ինչպես ասում են ֆրանսիացիները՝ վուալյա:

«Հարրի Փոթերի առաջին մասը՝ «Փիլիսոփայական քարը» մեծ էկրանին կցուցադրվի դեկտեմբերի վերջ, երեք օր՝ 22-ին, 23-ին և 24-ին։ Երևանը կընկղմվի հրաշքի և կախարդանքի մեջ»,- փոխանցեցին մեզ «Մոսկվա» կինոթատրոնից:

Մարիա Զարգարյան