Շրի Լանկայում ճգնաժամը կտեւի նվազագույնը եւս երկու տարի․ կառավարություն
Շրի Լանկայում ճգնաժամը կտեւի նվազագույնը եւս երկու տարի։Այս մասին ասել է Շրի Լանկայի ֆինանսների նախարարը՝ նախազգուշացնելով մոտալուտ ճգնաժամի մասին:
Էլեկտրաէներգիայի անջատումները եւ սննդամթերքի, վառելիքի եւ բժշկական պարագաների խիստ պակասը լայնածավալ տառապանքներ են պատճառել Հարավային Ասիայի կղզային պետությանը, հաղորդում է AFP-ը։
Հասարակության զայրույթը հանգեցրել է մշտական բողոքի ցույցերի, որոնց ժամանակ պահանջում են կառավարության հրաժարականը։ Կառավարությանը մեղադրում են տնտեսական ճգնաժաամի սխալ կառավարման մեջ, որն ամենավատն է Շրի Լանկայի համար 1948թ․ անկախությունից ի վեր:
«Մարդիկ պետք է իմանան ճշմարտությունը։ Ես չգիտեմ, թե արդյոք մարդիկ գիտակցում են իրավիճակի լրջությունը»,-ասել է ֆինանսների նախարար Ալի Սաբրին: «Մենք չենք կարողանա լուծել այս ճգնաժամը երկու տարվա ընթացքում, բայց այն գործողությունները, որոնք մենք այսօր կձեռնարկենք, կորոշեն, թե որքան երկար կձգձգվի այս խնդիրը»,-հավելել է նա։
Պաշտոնական տվյալները ցույց են տալիս, որ երկիրն ունի 1,7 միլիարդ դոլարի պահուստներ, սակայն այդ ցուցանիշի մեծ մասը ներառում է արժույթի սվոփը Չինաստանում, որը չի կարող օգտագործվել այլ երկրներից ներմուծման նպատակով վճարելու համար:
Սաբրին ասել է, որ կառավարությունը սխալ է թույլ տվել՝ հետաձգելով Արժույթի միջազգային հիմնադրամին օգնության դիմումը:
ԱՄՀ-ի հետ բանակցությունները շարունակվում են, սակայն Շրի Լանկայի Կենտրոնական բանկի ղեկավարն ասել է, որ վարկատուից գրավ ստանալու համար ամիսներ կպահանջվեն:
Առաջիկայում կառավարությունը կհրապարակի նոր բյուջե եւ կբարձրացնի հարկերը՝ պետական եկամուտները համալրելու համար։
«2019թ․ հարկերի կտրուկ կրճատումը պատմական սխալ էր»,-նշել է Սաբրին՝ հավելելով, որ Կենտրոնական բանկի նախորդ նախագահը նույնպես սխալ է թույլ տվել՝ սպառելով արտարժույթի պահուստները՝ պաշտպանելու Շրի Լանկայի գերարժեւորված արժույթը:
