Ռուսաստանի ավիադիսպետչերների գրեթե կեսը մասնակի պարապուրդի մեջ է
Ռուսաստանում մոտ 15 հազար դիսպետչերներ այս ժամանակաշրջանում գտնվում եմ մասնակի պարապուրդի մեջ: Դա Ռուսաստանում ավիադիսպետչերների գրեթե կեսն է, «Վեդոմոստի» պարբերականին ասել է Ավիադիսպետչերների դաշնային արհմիության նախագահ Սերգեյ Կովալևը:
Ըստ պարբերականի, Կովալևը նամակ է ուղարկել Ռուսաստանի գլխավոր դատախազություն և խնդրել է ստուգումներ անցկացնել տրանսպորտի նախարարության ենթակայության տակ գտնվող Օդային երթևեկության կազմակերպման պետական ընկերությունում, որը, արհմիության ղեկավարի պնդմամբ, աշխատավարձի ֆոնդը խնայելու համար կրճատում է հաստիքները և մարդկանց պարտադրում է կես դրույքով աշխատել:
Սակայն գլխավոր դատախազությունը հայտնել է, թե ստուգումներ անցկացնելու հիմքեր չունի: Այդ են արհմիությանը փոխանցել նաև Անվտանգության դաշնային ծառայությունից:
Արհմիության փոխանցմամբ, Օդային երթևեկության կազմակերպման պետական ընկերությունը համավարակի մեկնարկից հետո կորցրել է եկամուտների մոտ 60 տոկոսը:
Ուկրաինական ճգնաժամից հետո էլ արևմտյան երկրները փակել են օդային տարածքը ռուսական ինքնաթիռների համար, ինչից հետո իրավիճակն էլ ավելի է վատթարացել: Բացի այդ, պատերազմի կապակցությամբ Ռուսաստանի հարավում դադարեցրել են աշխատանքը 11 օդակայաններ:
Արհմիության փոխանցմամբ, օդային նավիգացիայի գինը ռուսական ավիաընկերությունների համար տասն անգամ ավելի քիչ է, քան արտասահմանյան ընկեությունների համար, մինչդեռ, ռուսական ընկերությունների սպասարկումից ստացվող եկամուտը ծախսերի մեկ վերցերորդին էլ չի հասնում:
