Չնայած Կոնստանտին Զատուլինի հետ կապված այսօրվա աղմկահարույց դեպքին, «Լազարևյան ակումբ»-ի հերթական նիստը, որը նախատեսված է անցկացնել հոկտեմբերի 28-ին՝ Երևանում, կկայանա։ Այս մասին MediaHub-ի հետ զրույցում ասաց Հայաստանի Դեմոկրատական կուսակցության նախագահ Արամ Սարգսյանը, ով նաև «Լազարևյան ակումբ»-ի անդամ է։

Նա նշեց, որ այսօր «Լազարևյան ակումբ»-ի խորհուրդը նիստ է անցկացրել և որոշում է կայացվել հանդիպումը չհետաձգել։ Դրան կմասնակցեն նաև ռուսաստանցի գործընկերները, սակայն, նրանց մասնակցությունը կլինի օնլայն ձևաչափով։

«Չնայած այս խայտառակ իրավիճակին, որ ձևավորվեց Կոնստանտին Զատուլինի հետ կապված պատմությունից հետո, մենք որոշեցինք, որ նիստը, այնուամենայնիվ, պետք է կայանա։ Բացի այդ, վաղը «Լազարևյան ակումբը» հանդես կգա դատապարտող հայտարարությամբ, որով կտեղեկացնի իր հետագա քայլերի մասին», - նշեց Սարգսյանը։

Նա նաև տեղեկացրեց, որ, հավանաբար, հենց վաղը Ռուսաստանի ԱԳՆ-ը բողոքի նոտա կհղի ՀՀ ԱԳՆ-ին ստեղծված իրավիճակով պայմանավորված․

«Նորանկախ Հայաստանի 30 տարիների պատմության ընթացքում սա առաջին դեպքն է, երբ Հայաստանը արգելում է իր երկիր որևէ պատգամավորի մուտք, այն էլ ՌԴ պատգամավորի, այն էլ` հայամետ կեցվածքով մշտապես աչքի ընած Կոնստանտին Զատուլինին»,֊ հավելեց մեր զրուցակիցը։

Ի դեպ, ՀՀ ԱԺ նախագահ Ալեն Սիմոնյանը մերժել է  Զատուլինի հրավերը՝ մասնակցելու «Լազարևյան ակումբ»-ի հանդիպմանը։ Այդ մասին հայտնում է ինքը՝ Զատուլինը՝ հրապարակելով Ալեն Սիմոնյանից ստացված նամակը։