Հանգուցալուծում չի լինելու. Մնացական Մարտիրոսյանի նկատմամբ հարուցված կարգապահական վարույթը նրա գլխին կախված սուր է․ Վարազդատ Հարությունյան
Մնացական Մարտիրոսյանի նկատմամբ հարուցված կարգապահական վարույթը, կարծում եմ, հանգուցալուծում չի ունենալու, այն օգտագործվելու է որպես Մնացական Մարտիրոսյանի գլխին կախված սուր։ Այս մասին MediaHub.am-ի հետ զրույցում ասաց փաստաբան Վարազդատ Հարությունյանը՝ խոսելով Երևանի ընդհանուր իրավասության դատարանի դատավոր Մնացական Մարտիրոսյանին կարգապահական պատասխանատվության ենթարկելու վերաբերյալ Արդարադատության նախարարի միջնորդություն մասին։
Հիշեցնենք, որ դատավորի նկատմամբ կարգապահական վարույթ հարուցելու և այն ԲԴԽ ներկայացնելու առիթը հանդիսացել է Վարդան Ջհանգիրյանն ընդդեմ Հայաստանի Հանրապետություն գործով Մարդու իրավունքների եվրոպական դատարանի 2022 թվականի մայիսի 18–ի վճիռը։
ԲԴԽ-ն որոշել է ներկայացված միջնորդության քննության կապակցությամբ նիստը նշանակել օգոստոսի 25-ին, ժամը 15:15-ին: Փաստաբանի կարծիքով՝ կա՛մ դատավորը պատասխանատվության չի ենթարկվի, կա՛մ վարույթը ձգձգվելու է։
«Մնացական Մարտիրոսյանն իր պրակտիկայում բազմաթիվ խնդրահարույց գործեր է ունեցել, բայց ինչ էլ լինի, մեկ բան հստակ է, որ վերջինս անշեղորեն կատարում է իշխանությունների կամքը»,- հավելեց Հարությունյանը։
Հիշեցնենք նաև, որ Մնացական Մարտիրոսյանի կայացրած դատավճռով դեռևս 13 տարի առաջ Վարդան Ջհանգիրյանը (ԲԴԽ նախագահի նախկին պաշտոնակատար Գագիկ Ջհանգիրյանի եղբայրը) մեղավոր է ճանաչվել և դատապարտվել 3 տարի ազատազրկման, սակայն այն պայմանականորեն չի կիրառվել։ Վարդան Ջհանգիրյանը հետագայում ազատվել է պատժից համաներմամբ:
Լիաննա Թորոսյան