Այն բանից հետո, ինչ պետական մակարդակով հայտարարվեց, որ «Սուրմալու» առևտրի կենտրոնում պայթյունից տուժած տնտեսվարողները փոխհատուցում չեն ստանալու, վերջիններիս շրջանում լուռ դժգոհություն է հասունանում:

MediaHub-ի տեղեկություններով, տնտեսվարողները ծրագրել էին այսօր բողոքի ակցիա անցկացնել՝ պահանջ ներկայացնելով թե՛ կառավարությանը, թե՛ «Սուրմալու»-ի ղեկավարությանը փոխելու իրենց մոտեցումն այս հարցին ու փոխհատուցման մեխանիզմ մշակել.

«Բա չե՞ն մտածում, թե մենք ոնց ապրենք, ընտանիք պահենք, հետո ինչ, որ ապահովագրություն չենք արել. Հայաստանում քանի՞ տնտեսվարող եք ճանաչում, որ իրենք մի քանի քառակուսի մետր խանութը կամ տաղավարն ապահովագրում ա»,- MediaHub-ի հետ զրույցում ասաց տնտեսվարողներից մեկը:

Սակայն մենք տեղեկացանք, որ «Սուրմալու» առևտրի կենտրոնի տնօրինությունը կարողացել է տնտեսվարողներին համոզել, որ բողոքի ակցիա այսօր չիրականացնեն՝ ասելով, թե զբաղվում են այդ հարցով և, մեջբերենք`  «ամեն ինչ անում ենք ձեզ օգնելու, հարցը լուծելու համար»: 

Մեր աղբյուրի խոսքով՝ այս անգամ որոշել են ընդառաջել «Սուրմալու» առևտրի կենտրոնի ղեկավարությանը, ու այսօր բողոքի ակցիա չեն իրականացնի, սակայն եթե առաջիկա օրերի ընթացքում հարցը լուծում չստանա կամ գոնե էական առաջընթաց չնկատվի՝ բողոքի ակցիան անպայման տեղի կունենա:  

Իհարկե դժվար է պատկերացնել, թե ինչ մեխանիզմ է մտածելու առևտրի կենտրոնի ղեկավարությունն այն դեպքում, երբ պետությունը, փաստացի, ձեռքերը լվացել է այս խնդրից ու բազմաթիվ տնտեսվարողներին թողել միայնակ ինքն իր խնդիրների հետ:

Հիշեցնենք, որ օգոստոսի 14-ին «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ: Պայթյունի հետևանքով եռահարկ շինությունը մասնակի փլուզվել է։ Ըստ պաշտոնական տվյալների՝ դեպքի հետևանքով 16 քաղաքացի է զոհվել, այդ թվում՝ մանկահասակ երեխա և հղի կին, ևս մեկ քաղաքացի այս պահին համարվում է անհետ կորած։