Արայիկ Հարությունյանը չեզոք դիրք է բռնել․ ՀՀ իշխանությունն ամբողջ բեռը թողել է Արցախի ուսերին․ Արթուր Մոսիյան
Հայաստանի իշխանությունն ամբողջ բեռը թողել է Արցախի ուսերին։ Իրենց խելքն այդքան է հասնում, մտածում են, թե Արցախից հրաժարվեն, կարողանալու են Նիկոլ Փաշինյանի հայտարարած 29 հազար 800 քառակուսի կիլոմետրը պահե՞ն․ սխալ մոտեցում է։ Այս մասին այսօր MediaHub.am-ի հետ զրույցում ասաց Արցախի ԱԺ «Հայ Հեղափոխական Դաշնակցություն» խմբակցության ղեկավար Արթուր Մոսիյանը։
«Արցախի և Հայաստանի անվտանգությունը փոխկապակցված է․ Արցախը զիջելուց հետո ստիպված է լինելու զիջել Սյունիքը, Վայքը և այլն, և այլն»,-ասաց նա։
Խոսելով սահմանին դիտորդներ ներգրավվելու մասին, պատգամավորն ընդգծեց, որ սա ևս մեկ քայլ է ապացուցելու, որ Նիկոլ Փաշինյանն իր դիվանագիտական ճանապարհը թեքում է դեպի Արևմուտք։
«Չեմ կարծում․ որ անզեն դիտորդների առկայությունն ինչ-որ բան կփոխի, որովհետև անգամ խաղաղապահները, որ զինված են, այստեղ Արցախում խնդիրների բացակայություն չունենք։ Խաղաղապահները, որ հաճախ չեն կարողանում ինչ-որ քայլեր ձեռնարկել, ԵՄ-ն ի՞նչ պետք է անի»,-ասաց նա։
Նիկոլ Փաշինյանի վերջին շրջանում ակտիվացումը Մոսիյանը որակեց որպես շղարշ՝ հանրության աչքերին։
«Իրականում, նրա քայլերը մեկնաբանելն անիմաստ է, քանի որ առավոտ մի բան է ասում, երեկոյան՝ այլ։ Ակնհայտ է, որ նա և իր վարչախումբը եկել են որոշակի խնդիր կատարելու, ինչ էլ հայտարարում է` այդ խնդիրները կատարելու շրջանակներում է։ Եկան, գունավոր հեղափոխության նման մի բան անելու, նաև Արցախը տալու համար, հենց դա են անում։ Լուծումը մեկն է՝ ՀՀ-ի վարչախմբից ազատվելն է, ինչքան մնան, այնքան ցավոտ զիջումներն անպակաս են լինելու»,-ընդգծեց Մոսիյանը։
Հարցին, թե ստեղծված իրավիճակից Արցախը կարո՞ղ է ինքնուրույն ելք գտնել, քանի որ նույնիսկ ՀՀ իշխանությունն էր ակնարկում Արցախին միայնակ թողնելու մասին, վերջինս պատասխանեց՝ Արցախն ունակ չէ ինքնուրույն դուրս գալ իրավիճակից։
«Արայիկ Հարությունյանն էլ ինչ-որ չեզոք դիրք է բռնել, չեմ հասկանում երկրի ղեկավարի չեզոքությունը»,-ամփոփեց նա։
Լիաննա Թորոսյան